664/2023-2024

Lunglei the 2nd June, 2023 – Vawiin khan Mizo Zirlai Pawl (MZP) Headquarters, Lunglei buatsaihin Saikuti Hall-ah HSLC leh HSSLC 2023 Exam a Mizo Zirlai Ti Tha Chawimawina hun hman a ni a. Social Welfare & Tribal Affairs Minister Er.Lalrinawma chuan he chawimawina hun hi a hmanpui a ni.

Vawiin program ah hian Lunglei town area chhunga zirna in atanga Mizo zirlai Distinction-a pass chin te chawimawi niin HSLC pass zirlai 71(mipa 39, hmeichhia 32) leh HSSLC pass zirlai 25 (mipa 15,hmeichhia 10)te chawimawina Citation hlan an ni a. 100% pass result nei Zirna in 12 te pawh chawimawina Citation hlan an ni.

Vawiin Zirlai Chawimawina program Pu Albert Lalnunpuia, Vice President, MZP Hqrs Lunglei kaihhruaiah Minister Er.Lalrinawma chuan MZP ten zirlai ti tha chawimawina an buatsaih chu ngaihsan tur dik tak an ngaisang a ni tiin lawmawm a tih thu sawiin thalai ten ngaihsan tur dik i hria ang u a ti. Lawmpuina leh chawimawina dawng thei zirlai te chu hetiang thleng thei tura hun tha an nei chu an vanneih zia hria se a duh thu sawiiin mi tam tak lehkhathiam thei tak tak harsatna hrang hrang vanga lehkha zir chhunzawm theilo an awm laia mahni kawtkai maia sikul tha tak awmin, nu leh pa ten duat taka an enkawl chu an vanneih zia hria a rim taka zirna chang hre turin a fuih a ni. A sawi zelna ah Minister chuan zirlaiten tawrhchhelna neih a tul thu leh harsatna hmachhawn thei tura inbuatsaih a ngai tiin mahni inkhawngaihna chu hlawhchhamna bulpui a ni a ti. Zirlaite chuan eng hna emaw thawh hun an la neih ngei a rin thu sawiin mamawhna avanga hnathawh tur kan dil a nih chuan rinawm leh diktak in kan thawk tur a ni a, mamawhna avanga kan dil nimahse min chhawrtuten min mamawh let tur a ni tiin mahni dinhmun ang zelin hnathawh tur awm te thawh hreh tur a nilo a ti bawk. Kan thil tih reng reng kan ram leh hnam a him em tih kan ngaihtuah thin tur a ni a, tun chawimawina an dawn chu an zir zelna tura chona petu ah ngaia nasa zawk a zir zel tur leh ram leh khawtlang, kohhran tana mi hmantlak nih tum tlat turin zirlaite chu chahin ruihtheih thil laka fihlim tum tlat a taksa vawng thianghlim tur leh HIV laka him tura mipat hmeichhiatna kawngah in veng fimkhur tlat turin a chah bawk.

He hun ah hian Lalpeksanga Chenkual, President MZP Hqrs Lunglei, Chinkhanmanga Thomte, AGS, MZP General Hqrs, Aizawl leh Col. Bejoy Ravindran, Commandant 3 Naga Hill Bn Assam Rifles, Lunglei ten thu an sawi bawk.

HSLC Distinction-a pass zirlai 71 te hi Holy Faith School atangin zirlai 27, Sacred Heart School atangin zirlai 18, Baptist Higher Secondary School Serkawn atangin zirlai 9, Bethesda Higher Secondary School atangin zirlai 5, Lawitlang High School atangin zirlai 4 te leh Eden Thar School of Life, Government Lunglei High School, Southern Flower School, Brilliant Boarding School, F.Lalkhama Memorial English School, Government Leitlangpui High School, Solomon’s Higher Secondary School, Adventist English School-te atangin zirlai pakhat theuh an ni a.

HSSLC Distinction-a pass zirlai 25 te hi Science Stream hnuaiah Baptist Higher Secondary School Serkawn atangin zirlai 4, Commerce Stream hnuaiah Government Lunglei Higher Secondary School atangin zirlai 2 leh Baptist Higher Secondary School Serkawn atangin zirlai 1, Arts Stream hnuaiah Baptist Higher Secondary School Serkawn atangin zirlai 5, Bethesda Higher Secondary School leh Solomon’s Higher Secondary School –te atangin zirlai 3 theuh, Government Lunglei Higher Secondary School atangin zirlai 2 leh Christian Education Centre, Sacred Heart Higher Secondary School, Government Leitlangpui Higher Secondary School, Zotlang Higher Secondary School leh D&D Higher Secondary School te atangin zirlai pakhat theuh te an ni.

Zirna in 100% pass te chawimawina Citation hlan te chu:

HSLC:

1. Brilliant Boarding School (Zirlai 14)

2. F.Lalkhama Memorial English School (Zirlai 15)

3. Nazareth Academy (Zirlai 3)

4. Holy Faith School (Zirlai 39)

HSSLC:

1. Saphranga Memorial School (Arts, Zirlai 2)

2. Bethesda Higher Secondary School (Arts, Zirlai 32)

3. Christian Education Centre (Arts, Zirlai 12)

4. Faith Hill School of Arts (Arts, Zirlai 5)

5. Chhimtlang Academy Higher Secondary School (Arts, Zirlai 6)

6. Stairway Higher Academy (Arts, Zirlai 8)

7. Narrow Road Academy Higher Secondary School (Arts, Zirlai 5)

8. New Life Academy (Science, Zirlai 14)