827/2023-2024

Aizawl, 16th June 2023: Vawiin khan Mizoram State Agriculture Horticulture Forestry & Marketing Cooperative Federation Ltd. (MAHFED) chuan Synod Conference Centre-ah Annual General Assembly vawi 25-na an nei a. He hun hi Social Welfare & Tribal Affairs changtu Minister Er. Lalrinawma chuan khuallian niin a hmanpui.

He hunah hian thu sawiin Er. Lalrinawma chuan Mizorama cheng tam zawk chu ram leilung behchhan a eizawng deuh vek an nih angin, MAHFED te mawhphurhna chu a zau hle a ni tiin, an hnathawh chuan ram sum leh pai dinhmun khaichhuahna kawngah hmun pawimawh tak a chang a ni, a ti a. Ramchhunga thlai leh thil dang tharchhuahte hlawk zawka hralh an nih theih nan, uluk taka zirchianna neih a tul thu sawiin Minister hian he ti lam kawngah hian MAHFED chuan ngaihtuahna seng se a duh thu a sawi a ni.

Minister hian Mizoramin state level-ah Federation changtlung tak tak a nei chu lawmawm a tih thu a sawi a. Amaherawhchu, hmasawnna tak tak a awm theih nan khaw tina society ( primary level society) te tihchangtlun a pawimawh a, chona lian ber pawh a ni, a ti. Cooperative Federation te chu an hmalakna leh hmachhawp reng reng ah primary level society te hamthatna ngaipawimawh turin Minister hian a ngen a ni. Kalkhawmte chu Cooperative Society huamchhunga thalai te senglut thiam a, ruihhlo laka fihlim a pawimawh zia thehdarhtu ni theuh turin a sawm bawk.

Vawiin General Body Meeting hi MAHFED Chairman Pu Vanlalruata chuan a kaihruai a. Managing Director Pu Ngurthantluanga chuan MAHFED hmalakna leh dinhmun hrang hrang report a pe a. Bairabi-ah cheng nuai 274 man warehouse sak chu Union Home Minister Pu Amit Shah in a hawn tawh thu leh Aizawl by-pass road (World Bank Road) ah warehouse dang sak mek a nih thu te a tarlang a. Tun dinhmunah MAHFED-ah hian share nei mi 114 awmin, cheng 1,80,83,647 a nei mek a ni.

MAHFED Ltd ah hian  Board of Director thlan tlin mi 9 leh sawrkar nominee mi 6 an awm a. Vawiin chawhnu hian hruaitu thar thlanna hun an  nei nghal bawk.