Social Welfare Minister Pu P.C. Lalthanliana chuan thu tha leh chanchin lawmawm lam sawi hi tunlai khawvelah kan uar deuh deuh a tul a ni, a ti. He thu hi tukin zinga Mizoram Upa Pawl Diamond Jubilee monument (lungphun) hawnna, MUP General Hqrs. Building-a hun hmanah a sawi a ni.

Social Welfare Minister chuan tunlaiah chanchinthar ah leh social media-ah te a chhe lai sawi kan uar thin avangin kan khawvel hi thalo pui ah ngaih mai a awl thin a. A tha tam tak a la awm tih kan hriat nan leh that lam kan pan theih nan kan thuchhuak leh kamchhuakah te thu lawmawm leh tha lam hi tam se, tiin thu a sawi a. Mizoram Upa Pawl chu pawl zahawm tak leh chutianga khawtlang nun hruai kawngah an pawimawh thu tarlangin Minister chuan Mizo fate tan MUP chu thlamuanna an nih thu a tarlang bawk.

Tukin zinga MUP kum 60 tlin hriatrengna lungphun lawmna pual inkhawm hi Pu R.K. Thanga, MUP President chuan kaihruaiin, Pu R. Thankima, Secretary chuan technical report a pe a. Lungphun leh a hungna buatsaih nan senso zawng zawng chu Rs. 45,200 a ni. Tun dinhmunah hian Mizoram Upa Pawl ah hian Sub Hqrs paruk awmin, Area 81, Unit 603 leh Member 60,000 an awm a, state pawnah Unit 13 an awm bawk a ni.