INTACH Mizoram Chapter ten Mizo zinga Kristiana inpe hmasa ber Taibawnga leh Mizoram chhunga missionary boral hmasa ber Howard B.Dinwiddie te hriatrengna lungphun an siamthat, Chief Minister Office thlang, Pu J.Malsawma In luhna kawta mi chu vawiin ni 30 December 2016 chawhnu dar 1:00 khan INTACH Mizoram Chapter Secretary Pu Thanseia’n a hawng.

Lungphun hawnna inkhawm hmanpuitu bialtu Minister Pu Lal Thanzara chuan Mizoram tana mi pawimawh leh hmasa te hriatrengna lungphun a duh apiang tlawh theih tura ualau taka siam a ni chu lawmawm tiin a buaipuitu INTACH Mizoram Chapter te chungah lawmthu a sawi a. Lungphun siamna tura MLA Local Development Scheme hminga Rs 4,06,000/- a lo tumsak thei pawh lawmawm tiin Mizo thil hlui vawnthat leh humhalh kawnga INTACH hmalakna leh thawhrimna ah lawmthu a hrilh bawk.

Lungphun hawnna inkhawm hi Pu P.Rohmingthanga, Convener, INTACH Mizoram Chapter-in a kaihruai a, Pu Rinsanga, Co-Convener, INTACH Mizoram Chapter-in lungphun buatsaih chhoh dan report a pe bawk.