Vawiin chawhnu khan Social Welfare Minister leh Lunglei North Assembly Constituency bialtu MLA ni bawk Pu PC Lalthanliana chuan Pukpui, Lungleia cheng vaibelchhe 4 senga sak tur Observation Home & Special Home lungphum a phum.

He lungphum phumna puala inkhawm Pi Vanlalpianpuii, Joint Director, SWD kaihhruaiah hian Pu PC Lalthanliana chuan Pukpui, Lungleia Observation Home & Special Home neih theihna tura nasa taka hma la tu Department a thawkte, Pukpui khawtlang hruaitute leh a hna thawk tura thlan Lushai Engineers te chungah lawmthu a sawi a. Social Welfare Department hnathawh hrang hrang te chu kan ram leh hnam tan rawngbawlna pawimawh tak a ni tiin Department hnathawkte inpekna leh thawhrimna chu fakawm a tih thu a sawi a. Social Welfare Department chuan Sawrkar Laipui Scheme hrang hrang chak takin a kalpui mek zel a ni tiiin Scheme thenkhat chu Sawrkar department dangte nena convergence-a kalpui a nih avangin Department dangte tan pawh Social Welfare Department hi malsawmna thlentu a ni, a ti. Observation Home & Special Home chu mipa tan ruahman a ni a, naupang kum tling lo sual kawng lo zawh tawh ten an nun khua kal zel tura an insiamthat theih nan kum thum (3) thleng pawh he home ah hian an cheng thei dawn a ni, a ti. Observation Home & Special Home-a awmte tan hian infiamna hmun tha tak siam sak an nih dawn bakah a chhunga awmte an tlanchhuah theihloh nan compound hung na mumal taka siam a nih tur thu a tarlang bawk. A building leh hmunhma tha taka sak anih ngei a beisei thu sawiin Pukpui khawltang leh NGO-te tawiawmna a ngen nghal bawk.

Vawiin Observation Home & Special Home lungphum phumna ah hian Lunglei West bialtu MLA Pu Chalrosanga Ralte, Sawrkar hnathawkte, tlawmngai pawl, khawtlang hruaitute, Lunglei MJA hotute leh mipui thahnem tak an kalkhawm a ni.