Vawiin khan National Institute for the Orthopaedically Handicapped (NIOH)-North East Regional Center, Rotary club Aizawl leh Social Welfare Department-te tang kawp bul tumin Social Welfare Department (SWD) Conference Hall-ah SWD Minister Pu P.C. Lalthanliana’n rualbanlote tanpuina a sem.

Khuallian Pu P.C Lalthanliana chuan lawm thu sawiin, NIOH-NE Officer-in-Charge leh Rotary club, Aizawl leh Department-te inpekna mi tam takin an hlawkpui a, a bik takin rualbanlote tan malsawmna ropui tak a ni, a ti a. Tunah hian SWD chuan hmeichhiate tanpui tur ‘Universal Women Helpline’ darkar 24 chhung hman tur a ruahman mek thu sawiin, sawrkar laipui atangin VANBANDHU KALYAN YOJANA (VKY) hnuaiah mipuite eizawnna siamsakna tur sum beisei mek a ni, a ti. Social Welfare Department thawh rimna chu fakin raipuar leh naupangte an enkawlna lawmawm a ti a, tar pension pawh an pek thin thu te a sawi a ni.

Programme-ah hian Wheel Chair 10, Bengdar 20, Kut leh ke lem 17 leh Rilru lama chaklo te tana inzirtirna kit 24 sem a ni. He huna hian Pu K. Ramsangzuala President, Rotary club, Aizawl leh Pu Alendra Tripathi Officer-in-Charge NIOH-NE, Aizawl pawhin thusawina hun a hmang a, Pi Sarju Moirangthem Lecturer-cum-PO (OT)-in hmanrua hman dan tur zirtirna a pe. Programme hi Pi Vanlaldini, Social Welfare Department Director-in a kaihruai a ni.