Nimin(8th October, 2014) khan Social Welfare Minister Pu P.C. Lalthanliana chuan Social Welfare Department Officers Association General Conference, Tourist Lodge Chaltlang a neih chu a hmanpui.

Minister Pu P.C. Lalthanliana chuan Social Welfare Department chu Zoram hmun kilkhawr taktak thlenga in zar pharh a, mipui rawngbawlna kalpuitu department pawimawh tak a ni, a ti a. Nu nau pai lai atanga tar chawmna leh tar pension thlenga buaipuitu an nih avangin hnathawhna kawngah Dan anga rorel tur a nih rualin ngaihdamna leh hriatthiamna nena kan kal pui a ngaih chang pawh a awm thin a ni, Minister chuan a ti bawk.

Department hmalakna, tunhma a hriat lar vak ngai loh, infrastructure lamah pawh hmasawnna hrang hrangah pawh tun kum nga kalta chhungin hmuh tur tam tak a awm chu a chhuanawmin, officer-te thawhrim rah a nih thu Minister chuan sawiin, Department Officer leh staff zawng zawng ten rinawm tak leh taima taka an tawiawm tawhna chu lawmawm a tih thu leh an kal zelna turah pawh in pawh taka thawhho a duh thu leh, a tulah chuan hna a chak zawk theihna turin phone a in rawn kual mai thin te pawh tha a tih thu Officer kalkhawmte hnenah a sawi bawk.

Minister chuan tar pension hmu awm ngawih ngawih, hmu silo te awm theih a nih avangin chungte chu dap chhuak, an hmuh tur diktak ten an hmuh theih na turin CDPO tin ten hma la turin leh Anganwadi Centre tin a naupangte enkawl danah tun aia tha zawk leh hmasawn zawk a kalpui thei tura inpekna thar nen project tinah tan la turin kalkhawmte chu a chah bawk.

Conference-ah hian Minister ho in District tin atanga lo kal CDPO-te leh Officer-te chuan Department chhunga harsatna an tawh leh hmalakna tur tul zualte an sawiho a ni.

SWD Officer Association hi 2014-2016 atan an hruaitu thlanna an nei nghal a. Chungte chu: 1) President : Pi Laldikkimi, Dy. Director ; 2)Vice President : Pu Vanlalnghaka Zote, Dy. Director ; 3) General Secretary : Pu K.Darthanga, DSWO ; 4) Assistant Secretary : Zoramthangi Chhangte, CDPO ; 5) Treasurer : Zonunpari Sailo, Special Officer Nutrition