Vawiin chawhnu khan Finance Minister Pu Lalsawta chuan ama Office ah State Planning Board Vice Chairman Pu H.Liansailova, Finance Department hotulian te leh State Planning Board a hotute kawm in October,2012 atanga March, 2013 inkar leh April, 2013 atanga September,2014 inkara Mizoram sawrkar sum hmanna hrang hrangte zirchiangin Mizoram sum dinhmun te an sawiho.

Finance Minister chuan Non-Plan senso ti pung zawnga Department-te intihlen a rem tawh lova, kan neih mek hnathawktute(man power) tangkai zawka kan chhawr thiam a ngai tawh a ni a ti a. Thawhchhuaha tam in State hauhsakna a pung tih kan hre theuh awm e, chuavangin thawkchhuak theitu tur, hnathawk thei mithiam leh chhawrtlak chherchhuahna(skills development leh Vocational studies) kan uar a ngai a ni a ti. Mizoram sum dawn tur leh hman dan tur,Estimates of Scheme of Financing 2014-15 chu a chiang thawkhat tawh a, Mizoram plan budget pawh November session ah chuan chinfel a nih tawh a rinawm a ni a ti a. Public expenditure review neih thin pawh hi awmze neilova a chhuah mai loh nan bawhzui tum a nih tur thu a sawi bawk a ni.

Finance Minister kaihhruaina hnuaia neih tak Public Expenditure Review Committee ah hian Department hrang hrangte sum hman dan leh duhthusamlo lai te Finance Commissioner Pi L.N. Tochhawng chuan a tarlang a. Finance Department in Mizoram sawrkar hnuaia hmalakna hrang hrang ah te leh a tulna ang sum hman dan tur tha leh awmze nei zawka a hriat ruahmanna leh rawtna a siam te pawh sawiho nghal a ni.

Finance Department chuan Non-plan senso pungzel chu a theih anga khuahkhirh chhunzawm zel ni se tiin rawtna a siam a. Dawng pha chin nilo, an Department in an kawl avanga lirthei hmangtu, joint director, deputy director, deputy secretary, under secretary leh officer dang te tam tak an awm tih hriat a ni a. Hei hian nasa takin POL mamawhna a ti sanga, sawrkarin sum tam tak a senso a ngaih phah thu tarlan a ni a. Tihtawp a nih thuai nan leh lirthei chuangliam Department ten an kawl mek 200 aia tam mah chu awmze neia hman a nih theih nana hmalak a tul thu pawh sawiho a ni. Heng bakah hian Department thenkhat CSS kalpui ten vantlang inkhawm an huaihawt in DA an sem thin tih hriat a ni a, heng te hi chhuichian a dan kalh a nih chuan tihtawp rawt a ni a. Tui in tur pek chhuahna atan sum hman leh mipui tui bill chhunluh inmil lo lutuk leh chawibelh nasa ta lutuk pawh enfiah rawt a ni.Department tamzawkin an hmanral tur sum tuk te hmang tha fu si in sawrkar a revenue an chhutluh ve tur erawh an ngaihthah tlang pui tih Finance Department Report chuan a tarlang bawk a ni.