Chief Minister Pu Lal Thanhawla chuan vawiin khan Aijal Club-ah World Bank bultum Mizoram State Roads - II Regional Transport Connectivity Project a hawng.

Chief Minister chuan Mizorama kan inkalpawhna ber hi motor kawngpui anih avangin khawtin inkalpawhna leh kawng tha kan mamawh hle a ni a ti a. Central sorkarin thingtlang khua inkalpawhna tur atana Pradhan Mantri Gram Sadak Yojana (PMGSY) a rawn duang chhuak hi Mizoram pawhin a vanneihpui hle a ni a ti a. Amaherawhchu hmalakna kawngah harsatna neuh neuh a awm avangin duh angin hna a chaklo a, tunah erawh heng harsatnate hi chinfel anih hnuah thingtlang khua motor in ala pawh loh zawng zawngte chu thlunzawm theih vek a beiseiawm tawh a ni a ti.

Chief Minister chuan Central sorkar leh World Bank hmalakna zarah Mizoram State Roads Project - II kan nei tur hi a lawmawm hle a, Project -I kum 2010 a zawh fel tak, Mizoram Hmarlam leh Chhimlam inkalpawhna, Aizawl-Thenzawl-Lunglei Road hian zin hun chhung nasa takin a kaihtawi phah a ni a ti a. Union Finance Ministry leh World Bank chungah kan lawm tak meuh a ni a ti. Chief Minister chuan India sorkarin Look East Policy hian hausakna tam tak a keng a ni tih hriain, hmarchhak bial hi a rawn ngaipawimawh tawh hle a ni a ti a. Mizoramin Bangladesh leh Myanmar ram te nena inkalpawhna tha neih hian hmasawnna chak tak a thlen thei a ni a ti. Mizo te hi Myanmar leh Bangladeshah thahnem tak kan awm avangin he project hi keini tan chuan a pawimawh hle dawn a, tuna he project ina a thawh hmasak tur, Champhai - Zokhawthar leh Tlabung - Kawrpuichhuah te hi an la pawimawh hle dawn a ni a ti. Bangladesh Prime Minister nen pawh vawi hnih an in hmuh tawh thu sawiin, Pu Hawla chuan an ni pawh an phur hle a ni a ti.

Chief Minister hian he project chungchang ziahna lehkhabu a tlangzar bawk a ni.

Chief Secretary Pi L.Tochhong in hawnna inkhawma kalte lawmna thu a sawiah he world bank project hian Mizoram chu hun tharah a vawrh chho dawn a ni a ti a. A enkawltu tur Mizoram PWD te chu tan la a, nasa leh zuala inpekna nen thawk turin a chah a, hetiang hun tha hi kan bawhpelh thianglo a ni a tih kan hriat a tha Chief Secretary chuan a ti a ni.

Pu Jitendar Malik, Under Secretary, Department of Economic Affairs, Union Ministry of Finance chuan DEA chu hetianga hmalatu a ni chu kan lawm hle a ni tiin, Mizoram chhung mai nilo thenawm ram te nen he project hian inkalpawhna tha a thlen ngei a beisei thu a sawi bawk a.

Pi Diep Nguyen-van Hautte, Senior Transport Specialist the World Bank & Task Leader, MRS-II RTCP pawhin thu sawiin he project ina a tum bulpui ber chu economic lama hmasawnna lian tham thlen tir a ni a ti a, Mizoram thenawm ram te nena economic- corridor siam chu hnapui ber a ni ang a ti. Pi Diep chuan road project bakah insumdawn tawnna atanga mipui ten ei leh bar, sum leh paia vawrh chhoh dawrh (economics transformation) chu a tum ani tih a sawi nawn in, Mizoram chu ‘economic power house’ a siam tum a ni a ti. He project hnathawh nan hian July 2014 - June 2015 chhung atan World Bank chuan US Dollar maktaduai 10.3 a pekchhuah tawh thu a sawilang bawk a ni.

World Bank hian Union Finance Ministrya Department of Economic Affairs kaltlanga sum hi a rawn pek a ni a. MSR -II RTCP hnuaia kawngpui siam, tih zauh leh tih chak turte hi Tlabung - Kawrpuichhuah -12 km, Champhai - Zokhawthar - 27.25 km leh Chhumkhum - Chawngte -41.53 km te an ni.

Hawnna inkhawmah hian Minister, Parliamentary Secretary, PWD Engineer te leh World Bank Team member, DEA official member te an tel a ni.