Vawiin khan Special Summary Revision of Electoral Rolls lo awm tur atana Booth Level Officer (BLO)-te hnathawh dan tur inzirtirna chu Agriculture Conference Hall-ah a thawh khatna neih a ni. Training hi Assembly bial panga (5) – Aizawl North I, II, III, leh Aizawl East I leh II huam chhunga BLO-te tan buatsaih a ni a.

Vawiin training hi Pu H. Lalhmingthanga, Election Officer-in kaihruaiin, Pu Lalchungnunga, Addl. DC, Aizawl-in a hmanpui a. Pu Lalchungnunga chuan BLO-te chu ram hnuk khawih thil hna thawktu an nih avanga fimkhur taka thawk turin a chah a ni. Training-ah hian Master Trainer pathum – Pu Rolungmuana, Pu VL Chhuanawma Chawngthu leh Pi PC Zonuntluangi ten zirtirna an pe a. BLO Training thawh hnihna leh thawh thumnate chu 10.10.2014 leh 16.10.2014-ah neih leh a ni ang.

Special Summary Revision of Electoral Rolls neih turah hian January ni1, 2015-a kum 18 tling tur chinte thun theih a ni dawn a. Kumin October ni 15-ah Draft Roll tar chhuah a ni ang a, dilna thehluh hun hi November ni 10, 2014 thleng hawn a ni ang.