Food, Civil Supplies & Consumer Affairs Minister Pu John Rotluangliana chuan Mega Block chhunga Mizoram tana buhfai Myanmar atanga lakluh luh dan tur chungchang buaipuiin Myanmar a Company thuneitute thil kalphung a sawipui. Minister hi ni 6.10.2014 ah Champhai ah thlengin Zokhawthar ah a riaklut nghal a. Ni 7.8.2014 khan Zokhawthar-a Tourist Lodge ah North West Brother Company Ltd. Director Pu Rothangpuia leh he Company -a Managing Director Pu Saithangruma te kawmin Myanmar Buhfai Mizoram lama lakluh a nih theih dan tur chungchangte an sawiho a ni. Mizorama Buhfai lakluh hun chhung tura ruahman hi ruahtui tlak loh lai a nih avangin tun dinhmunah kawng dinhmun tha vak lo mahse, tluang taka buhfai hi Myanmar atanga Mizoramah lakluh theih beisei a ni.

Minister hian tukin zing atang khan a chanpual department hrang hrang hmun hmate a tlawh a, New Champhaia Civil Supply Department Godown te, Tourist Lodge kianga building sak belh thar mek te, Keifang tlanga Civil Supply Department Building sak zawh tawh te, District Transport Office te, District Civil Supply Officer te leh Jail Venga Civil Supply Godown te a tlawh kual a, vawiin chawhnu lam khan Aizawl panin a kir leh ta.

Minister hi Pu T.T.Zothansanga, Parliamentary Secretary, Pu K.Lianzuala MKVI Board Chairman leh a nupui bakah a chanpual Department-a hotuten Aizawl atangin an rawn tawiawm a, Champhai atangin thuthar thehdarhtute leh DCSO in an tawiawm bawk a ni.