Social Welfare Minister Pu P.C. Lalthanliana chuan Mizoram chhunga hmeichhiate dikna humhalhna leh inthliarna awm lova khawtlang nun tha zawk siam theih dan zirhona – “Working Towards Ensuring Mizoram State Diversity Policy and Ensuring a Gender Just Society” tih thupui hmanga workshop buatsaih chu vawiin chawhma dar 10:00 AM khan a hawng. He workshop hi Hotel Regency Conference Hall-ah neih niin, Mizoram University hnuaia Women’s Studies Centre leh Public Administration Department-te, Control Arms Foundation of India (CAFI) leh Northeast India Women Initiative for Peace (NEIWIP) tangkawpin European Union puihna nena an buatsaih a ni. He hunah hian Pu LR Sailo, Press Secretary to Chief Minister chu khualzahawm a ni bawk.

Minister Pu P.C. Lalthanliana chuan mitin mai hian thliarhranna hmachhawn lova ang khat veka nung turin pianpui chavo leh dikna kan nei vek a, amaherawhchu hmeichhe thenkhat chu mipa an nih loh vang te in leh, a bik takin India hmarchhak amite chuan an hnam (race) vangin harsatna nasa tak an tawk thin a. Chung mite harsatna tuar thin sukiang tura workshop buatsaih a ni chu lawmawm a tih thu Social Welfare Minister chuan sawiin, mithiam rual kalkhawm chuan rah tha leh tangkai an sawi chhuah ngei a beisei thu a tarlang a. Mizoramah chuan hmanlai leh tunlai hun khaikhinin chhungkua leh khawtlang nunah hmeichhiate dinhmun a ziaawm tawh hle a, mahse chumi phenah chuan hmeichhiate chunga hleihlenna case tam tak la awm chuan hmalakna tur tam tak a awm tih a tarlang a ni, a ti a. Mizoram Police record-a lan dan chuan kum 2008 atang khan pawngsual case 303 leh, hmeichhe zinga mahni intihlum case 105 an chhinchhiah tawh thu te, National Family Health Survey 2005-2003 report-a lan dan a Mizoram ah a tlangpui a lakin hmeichhia pasal nei tawh zinga 22% chu pasal te kut thlak tuar thin an awm thu Pu P.C. Lalthanliana chuan tarlangin, heng bakah hian in report lo tam tak an awm ang tih a rin theih avangin, Sorkar hmalakna chauh ring lova, mimal, chhungkua, tlawmngai pawl leh khawtlang anga tangrual taka ke kan pen a ngai a ni, a ti.

Social Welfare Minister chuan hmeichhiate dikna humhalh turin leh dinhmun chawikawng tura Sorkar hmalakna hrang hrang a tarlang bawk a. Protection of Women against Domestic Violence Act in a phut anga Mizoram district zawng zawngah Protection Officer dah a nih tawh thu te; tlawmngai pawl hrang hrang (YWCA, VOLCOMH, etc.) chu hmeichhiate tan Service Provider-ah ruat an nih thu te; Aizawl Police Station-a Women Cell din leh Social Welfare Department hmalkana hnuaiah hmeichhia, chhungkaw khura tihduhdahna leh kutthlak tuar te tlanluhna tur Protective Home din a nih thu te a tarlang a. Hmeichhe harsa la thalai deuh ten mahni an inchawmna tur thiamthil an zir theih nan Vocational Training Centre (VTC) din a nih thu te, tanpui ngai ten phone hmanga an biakpawh mai theih tur Universal Women Helpline – 181 siam a nih thu te, hmeichhia kutthlak tuar te pan theih tur One Stop Centre (OSC) siam a nih thu leh, tun hnai maia ruahmanna siam, mipui hamthatna atana Sorkar hmalakna hrang hrang in ang khat veka mipa leh hmeichhia te tan hlawkna a thlen theih nana “Gender Budgeting” kalpui a nih thu te Minister hian a tarlang a ni.

Vawiin Workshop ah hian Mizoram chhunga hmeichhiate chunga hleihlenna thleng thin leh, ‘gender’ leh ‘race’ vanga thliarhranna thleng thin chu mithiam hrang hrang in presentation pe in zirchianna neih a ni a, hmalak theih dan tur sawiho a ni bawk. Hun hi Prof. Lalneihzovi, Women’s Studies Centre Hon. Director chuan kaihruaiin, Pi Binalakshmi Nepram, Control Arms Foundation of India Secretary General chuan Mizorama State Diversity Policy siam a nih theih nana hmalak dan tur te sawiin, India ram puma hmeichhiaten an hnam vang leh hmeichhia an nih vanga thlairna thuah hnih tawk lovin leh, ram muanna atana inthlunzawma, hma an lak ho theih dan tur thu a sawi bawk.