Vawiin khan Social Welfare Minister Pu P.C. Lalthanliana chuan Children’d Day puala Mizo Writers Association (MWA) in Mizo Children’s Literature Festival cum Mizo Proficiency Prize Distribution an buatsaih chu Chanmari YMA Hall-ah khuallian niin a hmanpui. He hunah hian Pu R. Hmingthanzuala, Art & Culture Director chu khualzahawm a ni.

Khuallian chuan Mizo Writers Association-in National Award dawng te hnenah leh Board exam leh zirna sang zawka Mizo subject bika titha te hnena lawmpuina award an pek leh, thu leh hla zirhona hun a buatsaih chu Mizo hnam zia rang humhalhna kawnga hmalakana chhuanawm tak a nih thu sawiin, Mizo kan nih chhung chuan Mizo tawng hi a pawimawh reng dawn a ni, a ti. Mizo ziakmi leh thuthiam tak tak ten pawl an indin a, kan hnam zirang humhalh tura an hmalakna chu fakawm a tih thu Minister chuan a sawi a. Hun kal tawh leh kan tawn mek te hi kan la tawn tur atana min kaihruai thei thu anih avangin ziak a chhinchhiah hi a pawimawh hle a. Mi zawng zawng hi thuziak mi kan nih loh avangin leh ziak mi ni tur chuan taimak a tul avangin Mizo Writer-te chu hnam ang zawnga ke kan pen naah pawh an pawimawh hle a ni, a ti a; chawimawi phu te chawimawi nachang an hria chu an entawntlak thu a sawi bawk. Social Welfare Minister chuan vawiin huna zirlai kalkhawmte pawh an hmabak ah taima leh tum ruh taka bei chho a, Mizoram tan ro hlu an nih hre reng turin a chah bawk.

Vawiin hun hi Pu B. Lalthangliana, Vice President, MWA chuan kaihruaiin, Art & Culture Director pawhin thu a sawi bawk a. Chawhnu lamah Mizo Children’s Literature Festival puala thu leh hla hrang hrang - Naupang hla hlutna te, Naupang tana thawnthu tangkaina leh Mizo naupang thu leh hla chhuina Seminar paper zirhona leh sawihona neih niin, Pu R. Lalrawna, President MWA chuan lawmthu sawina a hmang bawk. Govt. Mizo Higher Secondary School, Home Mission School leh NEUHOF School zirlai te he Festival-ah hian an tel a ni.

Social Welfare Minister chuan a hnuai ami te hnenah hian lawmman a hlan an ni:

1. National Sub-Junior TT Champion: Jeho Himnakulhpuingheta

2. National Awardee for Outstanding Teachers, 2016 : Pu H. Ngurthansanga

3. Ch. Pasena Proficiency Prize (HSLC, 2016 Mizo Topper):

C. Vanlalnghaka, Home Mission School

Lalmuankima, Synod Higher Secondary School

Lalrinfeli Millenium, Presbyterian Engliash School

4. Lalmama Proficiency Prize (HSSLC, 2016 Mizo Topper):

Remthangpuia, Home Mission School

Lalbiaktluangi, St. Paul’s Higher Secondary School

5. R. Buchhawna Proficiency Prize (BA, 2016 Mizo Topper): Vanlalhlana, Hualtu

6. J. Malsawma Proficiency Prize (MA, 2016 Mizo Topper): R. Lalngaihawma, Thingsulthliah