3500/2024-2025

2024 Pawltlak thla ni 12: Vawiin khan Social Welfare, Tribal Affairs, Women and Child Development Minister Pi Lalrinpuii, Lunglei East bialtu MLA ni bawk hovin Lunglei District-a MLA dang pathum - Lunglei North bialtu leh Lunglei High Powered Committee (HPC) Vice Chairman Pu V. Malsawmtluanga, Lunglei West bialtu Pu T. Lalhlimpuia leh Lunglei South bialtu Pu Lalramliana Papuia te chuan Lungleia home hrang hrang - TNT, WADA, Bethel Centre, Chhawmdawla In leh Rescue Centre te an tlawh.

Minister leh MLA-te hian intiam ruala pawisa an thawh khawm ₹ 2,70,000/- (cheng nuai hnih leh sing sarih) chu he'ng home-ahte hian Krismas thilpek atan an sem a. TNT-ah cheng nuai khat, WADA-ah cheng sing li, Bethel Centre-ah cheng sing nga, Chhawmdawlna Inah cheng sing li leh Rescue Centre-ah cheng sing li an hlan a ni.

He'ng home an tlawhnaah hian Minister Pi Lalrinpuii chuan nun kawnga harsatna tawkte hmangaih taka an enkawl chu ropui a tih thu sawiin, nula leh tlangval ṭha tak takte sual thiltihtheihnain a bawih tlat mai chuan thinlung a tina ngawih ngawih, tih a sawi a. Sawrkar chuan ruihhlo dona kawngah chak takin hma a la tih sawiin, ruihhlo bawiha tangte chu sualte sim a, Pathian lam hawi turin a chah a. TNT-ah mutna an indaih loh avangin kum upa lamte tan building pakhat sakna tur sawrkar laipui aṭangin cheng nuai 250 phalna an hmuh thu sawiin, WADA-ah Old Age Home cheng nuai 70 senga sak a nih tur thu a sawi bawk.

Home hrang hrangte hian mamawh leh harsatna an neihte Minister leh MLA-te hnenah hian an lo thlen a. Minister leh MLA-te chuan an mamawh leh harsatnate chu bawhzuisak a nih tur thu an sawi a ni.

Lunglei Home TNT hian mi 500 chuang enkawl lai neiin, WADA-ah enkawl lai mi 14 an awm a. Bethel Centre-in naupang 71 enkawl lai neiin, Chhawmdawlna Inah enkawl lai mi 82 an awm a. Rescue Centre-ah ruihhlo ngai mi eng emaw zat enkawl mek an ni bawk.