2201/2025-2026

Lunglei, 2025 Sahmulphah thla ni 13: Ministry of Social Justice and Empowerment hnuaia Pradhan Mantri Anusuchit Jaati Abhyuday Yojana (PM-AJAY) sum cheng nuai 525 senga Lunglei Pukpuia Higher And Technical Institute Mizoram (HATIM) Campus-a Scheduled Caste (SC) Girls Hostel sak tur lungphum chu vawiin khan Social Welfare Minister Pi Lalrinpuii'n a phum.

Social Welfare Minister Pi Lalrinpuii chuan hostel mamawhna a san avanga HATIM, ZMC&H leh Appolo Nursing School tan Social Welfare Department kal tlanga SC Girls Hostel sakna tur rawtna siam a nih dan leh ngawrh taka Ministry lama bawhzui a nih dan tar langin, thawktute theih tawp chhuahna leh sawrkar duhsakna zarah a hlawhtlinna hmuh a ni ta chu lawmawm a tih thu a sawi a. Contractor kutah hna thawh theih tura hlan fel a nih tawh thu leh hostel sakna tur dang pawh ruahmanna siamin, Ministry aṭangin pahnih/pathum vel hmuh leh beisei a nih thu a sawi.

Health & Family Welfare Minister Pi Lalrinpuii chuan Baptist Church of Mizoram (BCM) damdawi in, Christian Hospital Serkawnin sawrkar ngenna ngai pawimawha Mizoram Universal Health Care Scheme (MUHCS) an zawm avangin kohhran hruaitute leh kohhran mite chungah lawm thu sawiin, mipuite tana malsawmna a nih thu a sawi a. BCM-in upate enkawlna tur Old Age Day Care Centre siam a tum chu lawmawm a tih thu sawiin, Social Welfare nen thawh hona a awm theih a beisei thu a sawi a. Sawrkar, kohhran leh NGO-te thawh honaa Hulhliap Short Stay buatsaihah ni 20 enkawl an nih hnuah counselling nena um zui an nih bakah, thiam thil zirna (skill training) neihpui an ni ṭhin chu a ṭhatzia leh hlawkzia a lang chho mek tih sawiin, ruihhlo ngaite'n an sim hnua enkawl zuina ṭha a awm a pawimawh thu leh thiamna tak tak nei tur leh ram dangah pawh thawk thei tura chher hriam tum an nih thu a sawi a. Mizoramah HIV/AIDS a hluar thu te, ruihhlo leh mipat hmeichhiatna vanga darh nasa a nih thu te sawiin, ram tlu chhe mek siam ṭhat nan Social Welfare-in hmachhawp lian tak a neih thu leh kohhrante ṭawngṭaipuina leh thawhpuina an mamawh thu a sawi a. Kohhran thlek lam apiang mipuiin an thlek ṭhin avangin khawtlang siam ṭhatna (social concern) lamah kohhrante'n theih tawpa hma la zel tura ngenin, sawrkar pawhin an hma laknaah a theih anga thawhpui zel an inhuam thu a sawi a. SC Girls Hostel sak tur chu ṭha taka sak a nih theih nan leh zirlaite'n ṭangkai taka an hman turin a sakna tur lungphum chu a phum nghal.

Baptist Church of Mizoram (BCM) Education Department Director Rev. RC Lalthanzama'n hun kaihruaiin, BCM General Secretary Rev. Dr H. Lalthlamuana'n hunserh a hmang a. Social Welfare Commissioner Pi Lalzarmawii'n thu sawiin, HATIM-a Girls Hostel sakna lungphum phumna hun hman theih a ni ta chu lawmawm a tih thu leh senso hautak lo zawka hmeichhe ṭhalai rual tam tak an awm theihna tur hmasawnna chhenfakawm leh ṭangkai tak a nih thu a sawi a. Hostel sakna tur hmun zau leh remchang tak a awm chu lawmawm a tih thu leh Minister leh thawktute hma lakna zara hlawhtling a nih thu sawiin, zirlai hmeichhiate'n ṭha tak leh ngaihngam leh thlamuang taka class an kal theihna tur leh chhungkua leh ram tana malsawmna a nih thu a sawi a. Kohhran leh HATIM hotute chungah lawm thu sawiin, tluang taka hostel sak a nih theih nan duhsakna a hlan.

BCM Associate General Secretary (Service) Rev. Vanlalmuankima'n khuhhawnna thu sawiin, HATIM chu senso tlem zawka zirlaite zir chhuah theihna tur hmathlir neia din a nih thu a sawi a. Hmunhma leh hmanraw changtlung zawk mamawhna a sangin kohhran tan tih vek theih a ni ṭhin lo tih sawiin, tuna sawrkarin an mamawh em em girls hostel a saksak tur chu lawmawm an tih thu a sawi a. Sawrkar leh Minister leh department hotute'n ṭhahnem ngai taka hma an lakpuinaah lawm thu sawiin, beiseina sang tak nen an thlir dawn tih a sawi a. Kohhran ta chauh ni lovin, ram hmasawnna tur a ni tih hre chunga a ṭha thei ang bera saksak turin a satu turte a ngen bawk.

He hunah hian Minister leh Commissioner te bakah, ZOHANDCO Chairman Pu JK Dawngzuala, Social Welfare Joint Secretary Pi Zonunthari leh official hrang hrangte, BCM kohhran hruaitute leh HATIM-a thawktute leh zirlaite an tel a. Social Welfare Department-a Junior Engineer Pu Benhyafea Lalrinhlua chuan technical report pein, HATIM Principal Dr R. Lalnunthara'n lawm thu sawiin hun a khar.

HATIM Campus-a SC Girls Hostel sakna tur hian Ministry of Social Justice and Empowerment hnuaia PM-AJAY aṭangin kum 2024-25 khan sum cheng nuai 525 hmuh a ni a. Social Welfare Department enkawlna hnuaiah Excel Consultancy Services, Aizawl chuan a sak hna hi contract-in an thawk dawn a. Chhawng hnih (ground floor leh first floor)-a sak tur niin, a chhuat bulṭhut zau zawng hi square metre 777.60 (square feet 8,370.02) a ni a. November 2025-ah sak ṭan tur niin, October 2027-ah sak zawh tura ruahman a ni.