2202/2025-2026

Lunglei, 2025 Sahmulphah thla ni 13: November ni 13-15, 2025 chhung awh tur Leitlangpui Music Festival (LMF) 2025 chu vawiin chawhnu khan Kawmzawl (Pukpui, Lunglei)-ah ṭan niin, Mizoram Sawrkara Health & Family Welfare Minister Pi Lalrinpuii'n a hawng.

Leitlangpui Music Festival 2025 hawnna inkhawmah hian Health Minister Pi Lalrinpuii chuan nikum lama hlawhtling taka Leitlangpui Music Festival hman a nih hnuah kumina a ṭum hnihna hman a ni leh ta chu lawmawm a tih thu sawiin, LMF chu Kut buatsaih kawnga ramin Kalphung Thar a kaina, Sawrkarin festival leh event buaipui tawh lo va, private entrepreneur-te kuta a dah ṭanna a nih thu a sawi a. Festival hlawhtlinna tura mipuite'n an ta neih a ṭulzia leh Lunglei mipuite ngei pawhin an ngaih hlut a ṭulzia sawiin, sawrkar tih tur chin chu awm mah se, vantlangin an ta neihna (community ownership) tel lo chuan eng mah a kal rei thei lo tih a sawi a. Leitlangpui Music Festival chuan hlawhtling turin ṭobul nghet a nei sa tih sawiin, Zosap Missionary Pu HW Carter-a'n kum 1930 chho vela mi dangte tiphur thar a, Serkawn Concert hmanga thu leh hla lama harh tharna a lo thlenpuina kha a ṭobul a nih thu a sawi a. Leitlangpui Music Festival-ah chuan sawrkar chu a tlem thei ang ber inrawlh se, mipuite'n a tam thei ang ber buaipuiin ta neih se, thu leh hla lama harh tharna thlentu ni se tih te chu a duhthusam a nih thu sawiin, tourist tam zawk hipna a nih a, mipuiin hlawkna tam zawk an hmuh theih phahna a nih a beisei thu a sawi a. Chuti ang a nih theih nan chuan mipuite'n ngai hlu a, chawi lar zel turin a chah.

Minister Pi Lalrinpuii chuan sawrkar hma lakna ṭhenkhat tar langin, Lungleia Mizoram Engineering College awm tur chu lawmawm a tih thu leh tun sawrkarin college function nan cheng vaibelchhe 30 dah a, a ṭul dan anga hma lak chhoh mek a ni te, thawktu lakna tur MPSC-a thawn fel a ni tawh te chu lawmawm a tih thu a sawi a. Nakkum 2026 session aṭangin class neih ṭan theih beisei a nih thu leh nakinah phei chuan School of Engineering-a hlang kai a, Masters Degree zir theihna tura upgrade tura ruahman mek a nih thu a sawi a. Mizoram leh hnam runtu ruihhlo do beihpui thlak mekah ruihhlo ngaite tan kohhran, NGO leh sawrkar thawh honain Hulhliap Short Stay buatsaih a nih thu leh mi 817 vel enkawl tawh an nih thu sawiin, thlarau lam intuai tharna ni 5 chhung, damdawi hmanga inenkawlna (medical treatment/detoxification) ni 10 leh rilru lam inenkawlna (psychological treatment) ni 5, a zavaiin ni 20 chhung Synod Revival Camping Centre, Neihbawiah hun hmanpui an nih thu te, heta ṭanga an chhuah veleh After Care Follow Up atan thla 3 chhung vil zui ṭhin an nih thu te, ruihhlo bansan tak tak leh tumna neite chu Skill Training neihpui an nih thu te a sawi a. Skill Training hi trade chi 3 - Food Processing, Assistant Electrician leh Aluminium Fabrication-ah vawi khat buatsaih tawh a nih thu leh mi 60 chuang an training tawh thu te, tunah trade chi 3 - Assistant Electrician, Aluminium Fabrication leh Plumbing te MFM Centre-a training ṭan lehah mi 90 chuang an inziah luh thu leh la tih chhunzawm zel tum a nih thu te a sawi a. Ruihhlo ngaite enkawl nan ringawt sawrkarin cheng nuai 113 a pek chhuah tawh thu leh Social Infrastructure Cess hmuh tur aṭangin cheng nuai 150 chu Hulhliap Short Stay atan ruahman belh nghal a nih thu a sawi bawk.

Minister Pi Lalrinpuii chuan sawrkarin mipuite laka a intiamna a tihhlawhtlin tawh - "Ruang Phurh" chungchangah tun thleng hian thingtlang mi harsa zawk mi 1,445 te ruang chu an in lumah thlensak a nih tawh thu leh hemi atan hian sawrkar chuan cheng nuai 150.57 lai a sen tawh thu sawiin, dilna 76, a vaiin cheng nuai 8.63 senna tur buaipui mek a nih thu a sawi bawk a. Sawrkar Flagship Programme - Mipui health care, Mizoram Universal Health Care Scheme (MUHCS) hnuaiah mi rethei zawkte mahni pawisa seng miah lovin an inenkawl thei ta tih sawiin, tun thleng hian damlo mi 46,064 te inenkawlna bill chu damdawi inte hnenah sawrkarin a peksak tawh thu leh hemi atana sawrkar sum sen zat chu cheng nuai 6,948 a tlin tawh thu te, phai lama refer kal mi 2,818 an awm tawh thu te a sawi a. Mizoram chhunga empanelled private hospital 11, day care centre 3, phai lama empanelled hospital 25 leh Mizorama sawrkar hospital zawng zawng nen ṭang rualin mipui damlo enkawl turin sawrkarin ṭan a la mek tih a sawi.

Minister chuan sawrkar hnuaia hmasawnna kal chu a chhawr ṭangkaitu mipuite an nih thu a sawi a. Tourism lama hmasawnna thar, ni thum chhung awh tur Leitlangpui Music Festival pawh Lunglei mipuite tana kut hlu ni zel tur te, Mizoram mai bakah India ram chhung leh khawvel huapa lar, mipuite hnena hmasawnna thlentu ni ngei tura a duh thu sawiin, duhsakna a hlan a ni.

LMF 2025 Working Committee Chairman, Lunglei District Bawrhsap Pi Navneet Mann chuan inlawmna thu sawiin, Leitlangpui Music Festival ṭum hnihna buatsaih leh theih a ni chu lawmawm a tih thu a sawi a. Rimawi chu Mizote nunphunga bet tlat, pi pute leh ṭhangtharte suih zawma hnam ziarang tar langtu pawimawh tak a nih thu sawiin, Leitlangpui Music Festival chu rimawi hmanga inpumkhatna, hnam ziarang pho chhuahna leh khualzin hipna a nih a, tualchhung mite tana ei zawnna leh remchanna siamtu a nih zel a beisei thu a sawi a. Kut hlawhtlinna atana sum leh tha thawhtute - sawrkar hotute leh department hrang hrangte, tlawmngai pawl, khawtlang hruaitu leh mipuite, dawr hawngtu leh zaithiam zai tur zawng zawng chungah lawm thu a sawi.

Leitlangpui Music Festival hawnnaah hian ZOHANDCO Chairman Pu JK Dawngzuala pawhin thu sawiin, thiamhnang leh la deh chu ei zawnna tling a nih thu te, Mizo economy-ah leh khawlai sum leng velah an thawh hlawk thu leh Tourism Department thil tihpui nikhua nen a inhmeh thu a sawi a. Mizo hnam puan leh thuamte ven him a ngaih thu leh market tizau turin zahawm tak leh hnam dang lei theiha duan (design) thiam a ngaih thu a sawi.

Lunglei Sub-Headquarters YMA President Pu K. Lalfakzuala'n Kut hlanna thu sawiin, Mizo Cultural Artistes' Association (MCAA) Sub-Headquarters Lunglei te'n khuallam an entir bakah, YMA Sub-Headquarters Lunglei Cultural Troupe te'n cheraw an kan a. MUP Headquarters Lunglei te'n Kut hawnna hlado/bawhhla chhamin, zaithiam Lalenkawli Pautu, JH Peka leh Mizo Idol Season 8 Emmanuel Lalremruata te an zai a. Tourism Director Pi R. Lalrodingi'n lawm thu sawiin, concert-in chhunzawm a ni a. Rokhumbeu, Duati, Vanrammawii, Jessica, Thangromawia, Hillside, Ngura Sailo, David Darlong, Jaui, Lil Kiki & Rebecca, Sylvia Malsawmpuii, Laldinsanga Ralte, Zomuansanga, Emmanuel Lalremruata leh Siampuii Ralte te an inlan.

LMF 2025 hi Tourism Ministry aṭanga hmuh cheng nuai 25 leh Mizoram sawrkar aṭanga hmuh cheng nuai 25, a zavaiin cheng nuai 50 bakah, sumdawng leh agency hrang hrang aṭanga ṭanpuina (sponsor) sum hmuh hmanga buatsaih niin, Tourism Minister Pu Lalnghinglova Hmar kaihhruai Organising Committee, Lunglei District Bawrhsap kaihhruai Working Committee leh Tourism Director kaihhruai Sponsorship Committee te a awm a. Event management agency (EMA) atana tender hmanga thlan, Brighter Co. leh BBY Animals te'n Kut huaihawt hi buaipuiin, zaithiam hrang hrangte nen rimawi kutpui hun hman a nih dawn bakah, Kut chhimtute tan ei leh in, souvenir, hnam thuam leh kut themthiam thil chi hrang hrang zawrhna stall te, intihhlimna leh dan lam inzirtirna hmun te ruahman a ni a, stall hrang hrang 100 vel hawn a ni.

Naktuk, November ni 14 chawhnu dar 2:00 aṭangin Leitlangpui Band Contest top 10 intihsiakna buatsaih a nih dawn bakah, zaithiam zai ngaihthlak tur a awm leh bawk ang a. A tawp ni, November ni 15-ah tlai dar 5 aṭangin concert buatsaih a ni dawn bawk a. Kut chhung hian chawhnu dar 1 aṭangin stall hrang hrang tlawh theih turin a hmunhma hi hawn reng a ni ang.

National Handloom Development Programme (NHDP) hnuaia Mizoram Handloom and Handicrafts Development Corporation Limited (ZOHANDCO) leh Development Commissioner (Handloom), Ministry of Textiles, Govt of India ṭang kawp huaihawtin Hathkargha Mela State Handloom Expo chu Leitlangpui Music Festival neihna hmunah hian buatsaih nghal niin, Minister Pi Lalrinpuii chuan a hawng nghal a. Handloom Expo hi LMF-ah hian November ni 15 thleng hawn tur niin, November ni 17 - 27 chhungin Saikuti Hall-ah buatsaih chhunzawm a ni ang a. Mizo kutchhuak puan chi hrang hrang man tlawm taka lei tur a awm dawn bakah, Fashion Show, Concert & Fun Zone te pawh buatsaih a ni bawk ang.