Vawiin chhun dar 12:00 khan Social Welfare Minister Pu P.C Lalthanliana’n cheng nuai 22 senga sak Serchhip Block CDPO Office chu mipuite’n tangkai taka an chhawr turin a hawng.

Office thar hawnna inkhawmah thusawiin Minister chuan kum 30 zet mahni puala office nei lova mi hrang hrang in an luah lawr hnu a Serchhip khawchhung hmun nuam leh thengthaw tha taka CDPO office hmun nghet a awm ta chu lawmawm a tih thu sawiin, hemi atana theihtawp chhuaha hma la tu Mizoram Chief Minister Pu Lal Thanhawla leh Serchhip District Bawrhsap bakah Serchhip VC te chungah lawmthu a sawi nghal a, CDPO Office thar chu a building that leh ropui lamah nilovin mi harsate leh chhumchhia, rualbanlo te tanpuitu office ani tih hriatsak turin mipuite a ngen bawk a ni.

Minister chuan Mizoram Chief Minister Pu Lal Thanhawla thahnemngaihna leh hmalakna zarah Serchhip Kawlri Tlangah mirethei leh chhumchhia ten a thlawna lehkha an zirtheihna tur Sikul changtlung tak, Hostel awm nghal sak anih tur thu sawiin hemi atan hian cheng vaibelchhe 12 Sawrkar Laipuiin a pawm sak tawh thu leh, hnathawh tan na turin cheng vaibelchhe 5.66 chu kumin March ni 31 khan a rawn sanction fel tawh thu a sawi a, mipuite leh Sawrkar inlaichinna a that a tanrualna leh rilru dik put tlan anih phawt chuan Serchhip chu Mizorama District hmasawn chak ber ni thei turin kawng a in hawng zau hle a ni a ti bawk.

Khualzahawm District Bawrhsap Pu P.Lalchhuanga pawhin CDPO Office a thawktute tanrualna leh thahnemngaihna fakin, Anganwadi a thawktute hnathawh dan chanchin report a hriat thin te chuan a tihlawm thin thu a sawi a, ram a changkana hma a sawn chak poh leh Human Resource Development a thang tihna a ni a, chuvang chuan Social Welfare Department hi a hlu deuh deuhin hna pawh a neih tam belh zel dawn a ni a ti a, sawrkar hnathawkte chu mipuite chunga rorel tur leh inluling tura lak ni lovin, mipuite rawngbawl sak tur zawka koh an nih thu sawiin British tradition “Office Babu” kan la chhawm nasa a, hei hi kan kalsan a tul takzet tawh a ni a ti bawk.

Bawrhsap chuan Serchhip ah District Social Welfare Officer’s office (DSWO Office) a awm ve a tul thu sawiin hei hian nasa lehzuala mipui rawngbawlna kawnga a thawh hlawk a rin thu a sawi a, hma lakpui turin Minister hi a ngen nghal bawk a ni.

Serchhip CDPO Office hi Serchhip P&E Veng, Field No.II bul kawngpui an ah awmin a project hming atan “Construction of CDPO Office-cum-Nutrition Godown” tih a ni a, chhawng thum a sak niin Ground Floor hi 39.99 sq. metre a zau a ni a, First Floor hi 77.2 sq.metre niin Second Floor hi 108.32 sq. metre a ni a, a vaia belhkhawmin 225.51 sq. metre a zau a ni a, kum 2010 October thla atanga sak tan a ni.

Serchhip Block ICDS Project hnuaiah hian khaw 17 awmin Anganwadi Centre 93 awm tur a ruahman a ni a, tunah hian Anganwadi Centre 90 chu sak zawh tawh niin 3 dang chu sak mek a ni a, zawh fel a ni tep tawh tih CDPO Pi B.Lalhmangaihin a sawi a, heng Anganwadi Centre te hi khawtual mi ten an sak vek thu a sawi bawk. Hei bakah hian Serchhip CDPO Office atang hian tar chawmna (old-age pension) mi 830 hnenah pek an ni a, an zinga 294 hian CDPO Office atang tanpuina hi an la a, a dang zawng chuan bank kaltlangin an la a ni.

Hmeithaite tanpuina (widow pension) pawh hmeithai 45 hnenah thlatin Rs. 200 theuh pek an ni a, Rualbanlo (Vohbik) tanpuina hi mi 29 hnenah thla tin Rs. 200 theuh pek mek an ni bawk a, hei bakah hian Serchhipah Integrated Child Protection Society awm tharin thawktu mi 12- Protection Officer 2 leh Probation Officer 1 telin- an awm a, naupangte chanvo leh dinhmun vawnhim sak hna an thawk dawn a ni.

Vawiin CDPO Office hawn inkhawm hi Pi B.Lalhmangaihi, CDPO Serchhip ICDS Project in a kaihruai a, Pu Laltlankima, AE, Social Welfare Department in Technical report pe in Serchhip a Sawrkar Pisa hotute leh sawm bik te an tel tha hle a ni.