2286/2022-2023

Champhai, the 12th October, 2022: Ministry of Tribal Affairs, Govt of India sum cheng nuai 130 senga sak, Champhai Observation Home, Champhai Zote ami chu vawiin chawhma dar 10:30 khan Social Welfare & Tribal Affairs Minister Dr. K.Beichhua chuan a hawng. Minister hi Health & Family Welfare Board Vice Chairman Dr. ZR Thiamsanga, MLA leh Commerce & Industrial Development Board Vice Chairman Pu K.Laldawngliana, MLA ten an tawiawm a ni.

Social Welfare & Tribal Affairs Minister Dr. K.Beichhua chuan Champhai Observation Home hawn theiha a awm chu lawmawm tiin, tangkai taka hman a beisei thu a sawi a. Social Welfare Department chuan khua leh tuite hmakhua ngaiin hamthatna leh enkawlna kawng hrang hrang a ngaihtuah thin thu a sawi a. Poshan Abhiyaan kaltlanga hmalakna hrang hrangte tarlangin, nau piang zang lutuk tur ven leh pian hnua hnute tui nena tha taka chawm thlenga ngaihven niin, health department nen thawhho thin a ni, a ti a. Naupangte anganwadi an kai hnu thlengin chaw tha pek an nih thu sawiin, nu leh pate chu fate anganwadi-a hruaina chang hre tura chahin, anganwadi kal tha naupangte an thanlen zelna kawngah an ngaihtuahawm ngai lo a ni, a ti bawk.

Observation Home chu naupang kum tling lo dan kalha chete enkawlna hmun leh siamthatna hmun tura duan a nih thu sawiin, inhremna tur a ni lova, inzirtirna leh insiamthatna hmun tur a ni, a ti a. Rualbanlote tana hamthatna hrang hrang siamte tarlangin, tanpuina sum bakah loan thlenga siam tum a ni, a ti a. Social Welfare & Tribal Affairs Department Office Champhai pawh sak thuai tum a nih thu leh Tribal Girls Hostel sanction pekfel veleh sak tum a nih thu a sawi a. Khawtlang mipuite chu neitu thinlung pua tha tak leh tangkai taka hmang tura duhsakna hlanin Observation Home a hawng a ni.

He hun hi Pu James Lalrinchhana, Deputy Comissioner, Champhai chuan a kaihruai a. Pu Vanlalthasanga, JE, Women & Child Development chuan technical report a pe a. Pu Lalrinmuana, District Programme Officer, Women & Child Welfare Department chuan lawmthu sawiin hun a khar a ni.

He hunah hian Pu James Lalrinchhana, DC Champhai; Pu Ngurchungnunga Sailo, Commissioner, Excise & Narcotics Department; Pi Lallianpuii, Director, Women & Child Development Department, Sawrkar Department hotute leh sawm bikte an tel a ni.

Observation Home hi square metre 355.56 a zau a ni a, a kiangah hian Superintendent Office sq.m 43.61 a zau awm bawk a. Contractor chu CFH Consultancy Services, Republic Veng, Aizawl niin, a sak hna hi February, 2019 a tan niin November, 2021 ah sak zawh fel a ni.

Champhai District Observation Home hi March, 2015 khan din tan a ni a. Thawktu Superintendent, Accountant, Case Worker, House Father, House Mother, Medical, Cook bakah Security Guard pathum an awm a. Home-ah hian naupang sawmhnih panga (25) thleng an awm thei a, tunah hian naupang 6 enkawl mek an ni. Naupangte hi Juvenile Justice Board (JJB) in an chung thu an ngaihtuah sak thin a, thla 4 aia rei an awm theih loh avangin Special Home, CWC leh LIFECODE ah te sawn chhuah thin an ni.

Home din tirh anih atanga case lut tawh zawng zawng zat chu 268 niin, naupang hmun danga sawn chhuah tawh zawng zawng zat chu 34 an ni. Home a lut, bail-a chhuahtir tawh hi 47 an ni a, chhuah pangngaia chhuah zalen hi naupang 181 an awm tawh bawk a ni. Naupangte hi school kal a rem loh avangin non-formal education pek an ni a. Bible study, computer class, health education leh regular counseling-te neih pui thin an ni.