2286/2022-2023

Aizawl, the 12th October 2022 : Deputy Chief Minister Pu Tawnluia'n vawiin khan Biate Town Faina Committee in kum 5 a zawna Khaw Fai Intihsiakna, Mizoram Cleanliness Competition hnuaia Other Towns Category a Khaw Fai Lawmman an lak, lawmna hun Zialung Hall, Biate a an buatsaih chu khuallian niin a hmanpui a. Home Minister Pu Lalchamliana, bialtu MLA ni bawk pawhin he hun hi khualzahawm niin a hmanpui bawk a ni.

Khuallian Deputy Chief Minister Pu Tawnluia chuan Biate khua leh a mipuite chu faina kawnga an hmalakna avangin Mizoram pum tan entawntlak a nih thu sawiin tum 5 lai lawmman an lak hi an thawhrimna rah tha in sengna a ni a, ka lawmpui che u mahse duh tawk mai lovin hei aia sang zawka invawrh a, tan la zui zela, Mizoram tan faina kawngah a hma hruaitu ni a, entawntlak ni chhunzawm zel turin ka chah duh cheu ni, a ti a. ODF Plus ah inhlangkai turin tan in lak ka duh a ni tiin a sawi bawk. Biate khua, khaw fai ber a nih chhan pakhat chu chhungkaw tinah fai duhna an thinlungah a beh vang nia a rin thusawiin hei hi thlah lova inzirtir zel turin ka ngen cheu tiin a duh thu a sawi.

Pu Tawnluia chuan bawlhhlawh sawngbawl kawnga Sawrkarin tan a lak chho mek dante sawiin Aizawl leh District khawpuiah te bawlhhlawh sawngbawlna hmun Solid Waste Management centre te siam a ni a. Mahse chhungkuaah bawlhhlawh tawih thei leh thei lo thliar kan inzirtir leh kan tih hi a pawimawh a. Hei mai bakah bawlhhlawh hi engtin nge kan hman tangkai ang tih hi kan vei leh ngaihpawhmawh a tul hle niin ka hria a ti. Sawrkar Flagship Programme SEDP chungchang sawiin he programme hi Zoram mipuite dinchhuahna leh khaichhuahna tur a nih angin mipuiten an dawngsawng tha chu lawmawm tiin a hlawhtlin nan leh mipuite tawiawmna a ngen bawk a ni.

Khualzahawm Home Minister Pu Lalchamliana chuan a zawna tum nga lai pakhatna nih chu thil namai lo tak a ni, a zawna khaw fai ber lawmman vawi 5 lai Biate in a la hi a ropui a, hei hi eng dang vang ni lovin chhungtin leh mimal te tanrualna hnathawh rah a ni, a ti. A bial Hrangturzo chu faina kawngah a hmahruaitu nia a ngaih thu sawiin khaw(Town) fai ber Biate bakah khua(Village) fai ber Leng a awm bawk a, tui hna humhalh kawngah rampum huap lawmman an dawn te hian a tichiang hle niin ka hria, a ti.

Home Minister chuan faina chungchang sawiin faina leh hmasawnna hi engemaw chen a kalkawp a, faina hi hmasawnna bul a ni, a ti a. Lal hunlai atanga in leh lo fai leh fai lo endiktu an ruat te kha thil ropui tak nia a ngaih thu a sawi a. Tunah an dinhmun chu duh tawka, thlen chinah ding mai lova, hma bak an la nei tih hre renga tan la zel turin mipuite a chah bawk a ni.

He hunah thusawitu dang Pu H. Lianzela, Director, Urban Development & Poverty Alleviation Department chuan Mizoram Cleanliness Competition hnuaia Biate khua in lawmman an lak chanchin te, faina leh thianghlimna kawng hrang hranga Biate khua an entawntlak dan te, plastic chhia sawngbawlna lama hma an lak dan te a sawi a. Pu Lalrinliana, VCP leh Chairman, Biate Town Faina Committee pawh thu sawiin an khaw mamawh hrang hrang a thlen a. Dr. Lallawmkimi Chhakchhuak, Nodal Officer hnen atangin Biate khua in kum tam tak kalta atanga faina leh thianghlimna kawnga mipuite inzirtirna leh inkaihhruaina an lo kalpui dante, pawl hrang hrang leh khawtlang thawhho dante sawiin a hnen atangin report ngaihthlak a ni bawk. Khawzawl DC Pu CC Lalchuangkima pawhin he hun hi a hmanpui a ni.

Pu Tawnluia hian Biate Town Faina Committee te hnenah a zawna tum 5 khawfai lawmman an lak lawmpui nan cheng nuai khat a hlan a, lawmman hrang hrang an lak tarlanna thuziak a hlan tel bawk a. Biate Town Faina Committee in veng fai, dawr fai, thingpui dawr fai leh lawmman dangte an buatsaih te pawh a sem zui a ni. Joseph Lalrintluanga siam film tawi siam Faina Foundation Nghet, Biate khua in faina leh thianghlimna kawnga hma an lak film chu he hunah hian enho a ni bawk.

Pu B Lalruatsanga, VC Member leh Vice Chairman, Biate Town Faina Committee in lawmthu sawiin hun a khar a ni. 

2017 atanga 2021 thlenga Khawfai Intihsiakna ah te Biate hian Other Urban Towns Category ah lawmman 1-na bakah khaw fai ber Overall Prize khaw fai ber lawmman an la bawk a. Swacch Survekhshan 2018 hnuaiah Hmarchhakah Best Innovation & Practices lawmman leh Swacch Survekhshan 2020 a Hmarchhak bikah Best Citizen Feedback lawmman an dawng bawk a. Heng bakah hian Kayakalp hnuaia damdawi in fai thlannaah CHC leh Sub Centre fai ber lawmman te an lo la thin tawh a. Hmarchhak leh India ang pawhin Biate hi khawfai berte zingah a lang pha a. Heng bakah hian Biate in faina kawnga hma an lak dan chanchin hi India rama Sap tawng chanchinbu The Times of India, The Wire leh a danga te ziaha tarlan a lo ni tawh a ni.

Biate khua hi Lal hun lai atangin faina kawngah hma an lo la tawh thin a, in leh lo fai lo te chu lei chawitirin kawng hrang hrangin hma an lo la tawh thin a. Kum 1947 ah daih tawh khan khawlai phiah fai leh tihfai te an lo ti tan tawh a. 2004 atangin YMA Sanitation Sub Committee in bul tan thar lehin hma an la thar leh a ni.

Attachment

  • Loading attachment...