2284/2022-2023

Champhai, the 12th October, 2022: Animal Husbandry & Veterinary Minister Dr. K.Beichhua chuan tukin dar 8 khan Champhai Ruantlanga Live Animal Market siam chu a hawng. Minister hi Health & Family Welfare Board Vice Chairman Dr. ZR Thiamsanga, MLA leh Commerce & Industries Development Board Vice Chairman Pu K.Laldawngliana, MLA ten an tawiawm a ni.

Khuallian Dr. K.Beichhua chuan ram hmasawn leh thang apiangah Animal Husbandry & Veterinary a than zel thu a sawi a. Vawksaa intodelh theih nan pawn lam atanga vawk lakluh leh natna kaichhawn ven kawngah theihtawp chhuah a ni a, ranvulh lama tanlak niin kum 2-3 hnuah intodelh a thawn chhuah tur thlenga kan ngaihtuah laiin thuawihlo an awm avangin vawk hrilengin min nuai a, tun dinhmun hi kan thleng ta a, ran vulh tihhmasawn leh sa a intodelh kawngah tanlak chhunzawm leh mek zel a ni, a ti a. Ramri dep Champhai District atanga ramri kana ran lakluhte uluk taka enfiah leh dan anga kalpui a tul thu sawiin, a hlawhtlin theih nan mipuite thlawpna leh tawiawmna a ngen a. District hrang hrangah Vety Hospital-te hawn deuh vek tawh a nih thu sawiin, Champhai District Veterinary Hospital pawh zawh thuai tum a ni, a ti a. District thar 3 ah pawh Vety Hospital, DVO Qtrs leh Artificial Insemination kalpuina tur hmunhmate sak tum a ni, a ti bawk.

AH & Vety. Minister chuan Veterinary Doctor leh thawktu dang indaihlohna pawh theihtawp chhuaha ngaihven zel a nih thu sawiin, tun atanga reiloteah AH&Vety dinhmun tha zawk siam tum a ni, a ti a. Ram hmasawn nan leh economy tungding tura pawimawh tak, pipute hun atanga kalpui leh ngaihhlut hlawh ranvulh chawikan kawnga theihtawp chhuah tura hmalaknate tha taka tawiawm turin mipuite a sawm a ni.

Health & Family Welfare Board Vice Chairman Dr. ZR Thiamsanga chuan AH&Vety dinhmun tihhmasawn leh hrileng dolet kawnga Minister, Department thawktu leh District lama hotute hmalakna fakawm a tih thu a sawi a. Live Animal Market Ruantlang hawn a ni chu lawmawm tiin Champhai District tan leh Mizoram tana tangkai tak a nih a beisei thu sawiin, thuamthat leh enkawl chhunzawm zel kawngah theihtawp chhuah pui zel turin a sawm a ni.

Commerce & Industries Development Board Vice Chairman Pu K.Laldawngliana chuan Covid-19 leh ASF hrileng karah AH&Vety Department tihhmasawn nan sawrkarin theihtawp a chhuah thu sawiin, Live Animal Market chu a nihna leh tum ang taka hlawhtling taka kalpui a nih theih nan sawrkar, khawtlang hruaitu, media leh mipuite tanrual a ngaih thu a sawi bawk.

He hun hi Dr. Lalrinpuii Sailo, Director A.H. & Vety. Department chuan kaihruaiin Mizoram chhunga Block 26 ahte Mobile Veterinary Unit (MVU), Doctor, VFA leh Driver awmna dah vek tum a nih thu leh tihfel thuai tum a nih thu a sawi a. Dr. Thangzadinga, Deputy Director (Planning), A.H. & Vety. Department-in technical report a pe a. Dr.B.Lallawmsanga, District A.H. & Vety. Officer (DAH&VO) Champhaiin lawmthu sawiin hun a khar a ni.

Live Animal Market Ruantlang sakna tur atana funding agency hi NABARD Rural Infrastructure Development Fund-XXII (RIDF-XXII) a ni a, senso zat zawng zawng hi cheng nuai 260.84 niin, RIDF loan cheng nuai 246.50 leh State sum cheng nuai 14.34 te hmangin phase hnih 2017-2018, 2018-2019 kaltlanga sak a ni a. Live Animal Market Ruantlang hnuaiah hian hna hrang hrang 20; Ran lian chawlhhahdamna tur in 2, Ran te zawkte chawlhhahdamna tur in 1, laboratory, thawktute quarters, tuilakna, inkalpawhna kawng leh tul dangte thawh a ni.

He hmunah hian ramri kaltlanga ran lakluhte chawlhhahdamna, hriselna endikna leh damlo enkawlnate siam a ni a. Heta tang hian ran hrisela pawmte chauh phurhchhuah phal a ni ang. Eizawnna siam thei tura duan niin, project enkawl zui zel kawnga mawhphur turte ruatfel a ni bawk. Ruahman dan chuan thla tin ran lian 33605 leh ran te zawk 31076 te daha, lut chhuak thei tura duan a ni.

He hunah hian Pu James Lalrinchhana, DC Champhai; Pu Ngurchungnunga Sailo, Commissioner, Excise & Narcotics Department; Pi Lallianpuii, Director, Women & Child Development Department, Sawrkar Department hotute leh sawm bikte an tel a ni.