2283/2022-2023
Kolasib dated 12th October 2022: Vawiin khan DC Conference Hall, Kolasibah District Vigilance Committee on Fertilizers chuan thutkhawmna neiin 2020 – 22 chhunga Kolasib district-a Dealer-te kaltlanga lei tha (fertilizer) tih ral dan leh a dinhmun thlirletna an nei a. Kolasib district luhka hrang hrangah dan lo a lei tha phurh luh a awm loh nan endikna uluk zawk a kalpui dan tur an rel.

Pu John LT Sanga, Deputy Commissioner chuan huan leh lo enkawlna tha tak a kalpui a nih theih nan lei tha hman dan tawk bithliah a awm thu leh a lakluh leh tihral chungchangah pawh dan mumal tak a awm thu a tarlang a. A zuartute leh a hmangtuten heng dan hi kan hriatchian a pawimawh thu leh dan lo a lei tha phurh luh a awm loh nan Kolasib district luhka hrang hranga Police, Taxation department leh Food, Civil Supplies & Consumer Affairs department check-gate ahte endikna uluk zawk a kalpui a tul thu a sawi.

Vawiin thutkhawmah hian zau zawk a lei tha zawrh leh hralh chungchanga dan awmte inhrilhhriat a nih theih nana hmalak dan tur te, loneituten tangkai taka an hman theih nan hunbi mumal tak siam a Kolasib district chhung a lei tha dinhmun inhrilhhriatna neih dan tur te leh district luhka hrang hranga endikna uluk zawk a kalpui dan tur te sawiho a ni a. Kum 2022, February atanga August thla thleng khan dealer-te kaltlangin Kolasib district-ah Urea 644.18 MT lakluh tawh a nih thu leh loneitute mamawh tak, Di-Ammonium Phospahte (DAP) leh Muriate of Potash (MOP) erawh dawn a nih loh thu ngaihthlak a ni.

Thutkhawma tarlan danin Kolasib district chhungah hian M/s Pachuau Business House Wholesale dealer in Vairengte, Bilkhawthlir, Bairabi leh Kolasiba veng thenkhat a tuam a, M/s RL Enterprise Wholesale dealer in Thingdawl, Kawnpui, Lungdai leh Kolasib khaw chhunga veng thenkhat a tuam bawk a ni.