2299/2024-2025

Dated Aizawl, the 30th September 2024: Vawiin khan Social Welfare and Tribal Affairs Minister Pi Lalrinpuii hovin Mizo Kûtte zinga mitthite puala hman thin Mim Kût chu Vanapa Hall, Aizawlah urhsun taka hman a ni.

Mim Kût a hmanpuinaah hian Minister Pi Lalrinpuii chuan kût hmang tura kalkhawmte lawmna thu sawiin, Mim Kût chu nikum lam atanga hman tan leh chauh a nih rualin hmangaih kaltate puala thil tih khawm leh hun serhte erawh chu Mizote zingah leh hnam hrang hrangte zingah pawh tihdan fo a nih thute a sawi a. Hemi changchawi leh Social Welfare and Tribal Affairs hmalakna pakhat TRI scheme hnuaia Mizo Kûtte tuaithar lehnate behchhanin Sawrkar Department lamte, mithiamte leh tlawmngai pawlte bakah Chanchinbumite leh Mizoram Kohhran Hruaitu Committee-te nena Mim Kût chu duanho a nih thu a sawi bawk a. Mizo Kûtte chu khawvel hriata pho chhuah hmain a kût neitu Mizo mipuite rilru chawhthawh phawt tul nia an hriat avangin kût hman dan thu ah pawh thuken bikte neiin, mitthi pual thlaichhiah aiah miharsa zawkte tana luanchhuahna hun hmang tura insawmna leh hmangaih kaltate zalhna thlanmual tihfaina hun hmante chu tha hlea a hriat thu a tarlang a. Mitthite chuan minung chaw chu mamawh lo mahse, an kalsan takte ngaihven leh ngaihsak chu an tana kan tih theih ropui tak a nihh thu a sawi bawk.

Mim Kût puala hun hmanah hian Social Welfare and Tribal Affairs Director Pi Lalhriatzuali Ralte pawhin thu sawiin, Mizo pi leh pute lo hman thin kût te chu tunlai mil leh tih chhan tha zawk nena hman leh vawnnun bakah, chhuan thar zawkte'n an chhawmnun zel theih nana zirtir leh kaihhruai chu Mim Kût hman chhan bulpui ber zawk a nih thu a sawi a ni.

Hemi zawh hian Mim Kût puala buatsaih essay inziahsiak lawmman sem a ni a. Zaithiam sawm bikte'n kalkhawmte hi Pathian fakna hla leh Mizo zai hlate hmangin an awi bawk a ni.

Mim Kût hi hmanlai Mizo pipute chuan an chhungte thi tawh puala hun an hman thin a ni a. He hunah hian mitthi chhungte chuan mitthite lo ei ve tur ni a ngaiin eiturte an dahsak thin a; hei hi 'Thlaichhiah' tih a ni. Mim Kût hi Mizo thawnthu pakhat 'Tlingi leh Ngama' thawnthu behchhana lo intan nia hriat a ni a, he kût leh a hmandan thuah hian September ni 23, 2024 khan mithiamte nena sawihona hun (talkshow) pawh lo buatsaih tawh a ni.