2300/2024-2025

2024 Mimkut thla ni 30: Mizoram sawrkar Social Welfare, Tribal Affairs, Women & Child Development (SWTA&WCD) Department hma lakna hnuaiah 'State Steering Committee for Celebration of Mim Kut' chuan Mizo hnam kut pakhat, mitthi pual kut, 'Mim Kut 2024' chu vawiin September ni 30, 2024 hian hman tura a ruahman angin leh General Administration Department (GAD)-in he Mim Kut pual hian sawrkar pisa leh zirna inah te thawktute'n a remchan anga Mizo hnam thuam inbel ṭheuh tura ruahmanna a siam angin Lunglei District chhunga sawrkar pisa hrang hranga thawktute chuan vawiin khan hnam thuam inbelin pisa an kai hlawm.

Lunglei District-ah hian a hranpaa Mim Kut hmanna hun buatsaih a ni lo va. Aizawla Vana Pa Hall-a Mim Kut puala hun hman chu ral aṭanga lo chhim theih tura youtube kal tlanga pek chhuah a nih angin Lunglei District chhungah a en theihna tur 'youtube link' hi theh darh niin, Bawrhsap pisa chuan he hun hman hi a remchan dana lo chhim turin ngenna a siam a. Hei bakah hian Mim Kut pualin sawrkar pisa hrang hrangah thawktute'n hnam thuam inbel tura ngenna siam niin, he ngenna hi Lunglei District-a sawrkar hna thawkte chuan an zawm ṭha hle a. Mizo hnam ziarang lantir thei tura hnam thuam inbelin pisa an kai hlawm a ni.

Lunglei District Bawrhsap Pu R. Lalṭhazuala chuan Lunglei District mipuite Mim Kut chibai a buk a. SWTA&WCD Department hma laknaa kum 2023 aṭanga Mim Kut tharthawh leh a ni chu hnam ziarang leh nunphung chawi nunna pawimawh tak nia a hriat thu sawiin, pi pute hman ang diak diaka hman rem tawh lo mah se, pi pute'n heti ang kut hi an hmang ṭhin a ni tih hriat reng nan leh hnam ziarang humhalh nan hman dan ṭha zawka her rem chunga chhawm nun zel pawimawh a tih thu a sawi a. Mim Kut chu mitthi pual kut a nih angin lusun khawharte tuarpuina hlanin, District mipuite chu an hmangaih kal tate hriat reng nana thil ṭha pakhat tal tih tum tur leh thih hnu piah lam thlir chunga nun hman a pawimawhzia ngaihtuah thar ni atan hmang turin a chah a ni.