1750/2023-2024

Aizawl, 04.09.2023: State Level Steering Committee for Celebration of Mim Kut chu vawiin khan an chairman Social Welfare & Tribal Affairs Minister Er. Lalrinawma hovin Excise & Narcotics office conference hall-ah Mim Kut lawm dan tur relin an thukhawm.

Minister Er. Lalrinawma chuan Mizo in kutpui kan neih dangte anga Mim Kut chhawm nung tura ruahmanna siam a ni chu lawmawm a tih thu leh, thangtharte’n Mizo culture leh history an hriatchian zel theihna atan hman tangkai tha a tih thu a sawi a. Mizo nun hlui leh nun ziarang te theihnghilh leh kalsan mai a nih loh nan Mizo te bawk a mawhphurtu chu kan ni, a ti.

Mim Kut lawmna tur ruahman mek hi sawrkar bultuma Mim Kut buatsaih hmasa ber tur a ni a. Social Welfare & Tribal Affairs Department kaltlangin sawrkar laipui atanga a lawmna tur sum hmuh a ni a. September ni 29 ah hian Vanapa Hall-ah rokhawlhna dang a awm loh chuan lawm tura ruahman niin, programme kimchang zawk chu programme sub committee in an ruahman dawn a ni. Vawiin meeting-ah hian Social Welfare Dept. bakah Art & Culture, School Education, I&PR leh MKHC, MUP, CYMA aiawhte an tel a ni.