1751/2023-202

Aizawl, the 4th September, 2023: Chaw tha leh hrisel ei inzirtir uar thla, Rastriya Poshan Maah - National Nutrition Month-2023, a tum 6-na September thla chhunga kalpui tur chu vawiin chawhnu dar 2 khan Social Welfare & Tribal Affairs (SW&TA) Minister Er. Lalrinawma'n Directorate of Women & Child Development, Tuikhuahtlangah a hawng. Kumin atana thupui thlan chu 'Suposhit Bharat, Sakshar Bharat, Sashakt Bharat - Well-Nourish India, Literate India, Strong India (Chaw tha leh zirna tha nena thuam chak India)' tih a ni.

Khuallian Social Welfare & Tribal Affairs Minister Er. Lalrinawma chuan India ram zau tak, mi chitin awmnaah chaw tha taksa mamawh ang hmu lo mi engemawzat an awm thu sawiin, Sawrkarin hei hi ngai pawimawhin kum tin chaw tha ei kawnga inzirtirna leh hmalakna 'Poshan Maah' September thlaah a kalpui thin thu a sawi a, hei hian rah tha a chhuah ngei a beisei thu a sawi. Nunna turin ei tur, in leh lo bakah silhfen a pawimawh thu sawiin, heng zinga pawimawh hmasa chaw ei tur neih loh chu thil buaithlak leh a lova awm theih loh a nih thu sawiin, Sawrkarin ei leh bar kan tlakchham loh nan man tlawm zawkin food security kaltlangin eitur a ruahman thin thu a sawi a. Poshan Abhiyan hnuaia hmalakna chu Department pakhat kutah chauh a awm loh thu sawiin, Line Department dangte nena thawhhona ropui a tih thu a sawi bawk.

Rastriya Poshan Maah hman chuan chaw tha mamawh naupang, hmeichhia leh naupaite tan rah tha a chhuah ngei a beisei tlat thu thu a sawi a. Sawrkar scheme pawimawh tak takte hlawltling zawka kalpui turin khua leh tui tha, ram leh hnam hmangaih, neitu nihna thinlung pu mi ni tura inzirtirna kalpui tel tam a tul thu a sawi bawk a. Poshan Maah-in a tum zinga tel van ruahtui dahkhawl leh hman tangkaite bakah thupui dangte chu ram hmasawnna tura tul a ni tih hriaa a hlawhtlin theih nana tan lak tlan a tul thu a sawi bawk a. Hmalakna hrang hrang kalpuite tha taka hlen chhuah a ni thin chu lawmawm tiin Department hnuaia thawktute inpekna fakawm a ti a. Mizorama Rastriya Poshan Maah 2023 hlawhtling taka kalpui a nih theih nana duhsakna hlanin a hawng a ni.

Poshan Maah (Nutrition Month) hi Ministry of Women & Child Development hnuaia Nutrition Mission lian tak Poshan Abhyiaan hmalakna zinga program pawimawh tak niin, kum 2018 atang khan kum tin India ram hmun hrang hrangah September thla chhungin hman thin a ni a. Kumin bikah chuan thupui zulzui hian hmalak dan tur hrang hrang 7; Hnute tui leh chaw tha dang hmanga naute chawm len, Naupang hriselna kawnga intlansiakna, Ei tur tha leh zirna kalkawp tir, Nunphung dik leh tha hmanga hriselna, Ram leh hnam hmangaihna kawnga inzirtirna, Ei tur tha atana tualchhung thar chhuah ngei hman leh Ei chhiat avanga thisen tlakchhamna ti reh tura hmalaknate kaltlangin inzirtirna neih tum a ni.

Poshan Maah kaltlang hian Poshan Abhyiaan thiltum hrang hrang - naupang kum 6 hnuai lam thanthu ven, an kum leh an rih zawng inmil lo lutukte, an san zawng leh an rih zawng inmil lo lutukte nuaibo tum a ni a, hmeichhe tleirawl leh nu hote zinga thisen tlakchhamna anaemia awm thin tih hniam leh naupiang hlim buk zang lutuk awm thin tih hniam tumin mipui vantlangah a zau thei ang bera zirtirna leh inhrilhriatnate neih thin a ni.

Vawiin Rashtriya Poshan Maah 2023 hawnna hun hi Pu V. Zaithanmawia, Deputy Secretary, Social Welfare & Tribal Affairs Department chuan kaihruaiin Pi Sailopari, Deputy Director, Women & Child Development-in Poshan Maah 2023 thupui behchhana hmalak dan tur duan lawk tarlanna Poshan Maah Calendar 2023 a sawifiah a. Pi Zoramthangi Chhangte, Director, Women & Child Development-in lawmthu sawiin hun hman a khar a ni.

He hunah hian Directorate of Women & Child Development hnuaia thawktute an tel a. District hrang hranga thawktute'n Poshan Maah hawnna hun hi YouTube Live kaltlangin an chhim bawk a ni.