1752/2023-2024

Aizawl 4th September, 2023: Pu Lalchhandama Ralte, School Education Minister chuan A.R. Ground-ah Teachers’ Day 2023, Vawi 62 lawmna pual exhibition football match programme chu khuallian niin a hmanpui.

Khuallian chuan kan hnam hla "Ro min rel sak ang che" tih chu zah taka sa thin tura chahin kan hnam hla kan sak apiangin kan awmna hmunah ding chungin zah tak chunga sa thin tur kan ni a ti. Kan ram leh hnam zahpui lova, kan culture-te zirlaite'n uar lehzuala kan chhawmnun a pawimawh thu a sawi. Zirtirtute Ni chu state pum huap programme siam a that rualin zirlaite'n anmahni school theuha zirtirtute chawimawna function buatsaih an duh thin avangin State Level Working Committee (SLWC) chuan mahni remchan dan anga zirtirtute ni hi hman tura ruahmanna siam a ni a ti a. SLWC ruahmanna bawhzuia vawiin exhibition football match buatsaih a ni chu lawmawm tiin players zawng zawngte duhsakna a hlan nghal bawk a ni.

Teachers' Day 2023 pual exhibition football match-ah hian Government school 22 leh Private school 32 aiawh zirtirtute'n an khel a ni. Exhibition Match 1 hi hmeichhiate'n 15+5+15 minutes an khel a. Match 2 hi mipain 25+5+25 minutes an khel bawk a ni. Hmeichhe exhibition match 1-na hi Mizoram Independent School Association (MISA) leh Mizoram Government School te'n khelin MISA hian 1-0 -in hnehna an chang a ni. Mipa exhibition match 2-na hi full time a inhneh tawkin penalty ah MISA te’n Government zitirtute an hneh bawk a ni.

Vawiin exhibition football match programme hi Pu Lalhmachhuana, Addl. Director School Education-in kaihruaiin Aizawl khawpui chhunga zirtirtute an tel tha hle a ni.