1753//2023-2024

Aizawl 5th September, 2023: Vawiin khan ni li awh (5th-8th) Mizoram Civil Servicers Sports & Cultural Association Annual Sports meet vawi 34-na chu Govt. Mizo High School Multipurpose Hall-ah hawnna programme hman a ni a. Dr. Renu Sharma, IAS, Chief Secretary, MCSS&CA Patron ni bawk chuan khuallian niin a hmanpui.

Khuallian chuan kumtin August Ni 29 chu kan ramin Indian National Sports Day, hockey legend Maj. Dhyan Chan hriatreng nan kan rama inkhelmi te’n kan ram tan theihtawp an chhuah chawimawina hun atana hman thin a ni a. Infiamna hlutna hrang hrang mahni invawn thianghlim, tumruhna, thawhhona tha leh taksa hriselna te chu Sorkar pawhin a ngaipawimawh hle a ni a ti. Mahni hna theuh a buai tak tak vek kan nih avangin sports meet chu taksa sawizawina hun remchanga hmang turin infiammite chu a chah a, rilru hahna te tizangkhai tura hmanraw pawimawh tak ni ngei se a duh thu a sawi bawk. Kum 1988 atanga tun thlenga kumtin Kum 1999, 2020 leh 2021 tih loh a MCSS&CA sports meet buatsaih theih a ni chu lawmawm a tih tak zet thu a sawiin MCSS&CA patron a nih angin nakum february 14th - 16th, 2024 chhungin cultural items a intihsiakna buatsaih a ni leh dawn tih sawiin sorkar phalna pawh hmuh tawh a nih thu a sawi a. Department zawng zawngte he cultural items intihsiakna-ah hian tel vek turin a sawm nghal bawk.

Khuallian chuan infiammite fuihin "Olympic Games a chak aiin a tel hrim hrim nih kha a hlu zawk a, hringnunah pawh hian chak ber nih aiin tan rei a pawimawh bakah hnehtu nih aiin tha taka indona hmachhawn a pawimawh zawk a ni" a ti. Sports meet chu inunauna tha thlentu ni tur leh inthianthatna thlentu ni ngei turin inkhelmi zawng zawngte duhsakna a hlan a ni.

Pu Rosangliana Gen. Secretary, MCSS&CA chuan report a pe a, MCSS&CA annual sports meet chu then hniha then niin then khatna-ah hian vawiin atangin ni 8 thleng infiamna hall hrang hrangah Chess, Chinese Checker, Badminton, Carrom leh Table Tennis-ah te sorkar hnathawk infiammi 300 vel an intihsiak dawn a. Phase-2 inelna hi nakum February-ah neih chhunzawm tur a ni.

Dr. Chawngthanchhunga, Sr. Vice President, MCSS&CA-in inkhawm hi kaihruaiin thutiamna (oath taking) neiin opening ceremony hi khar a ni.