1754/2023-2024

Aizawl, 05.09.2023: Chief Minister Pu Zoramthanga chuan vawiin khan Mt. Carmel School in Teachers’ Day puala programme Lammuala an buatsaih chu khuallian niin a hmanpui.

Chief Minister chuan Mt. Carmel School zirtirtute leh Mizoram a zirtirtu zawng zawngte chu Teachers’ Day chibai a buk a. Zirtirtute pawimawhna sawiin, naupan lai atanga min kaihruaitu zirtirtute hi kum a lo veiin an hlutzia kan hrechhuak belh zel thin a ni, a ti. Zirtirtu hna chu hna zahawm leh chawimawi phu a nih thu sawiin, zirtirtute pawh ram nghahfak naupang leh thalaite an kaihhruianaah theihtawp chhuah chhunzawm zel turin a chah. Chief Minister chuan zirlai kalkhawmte chu mahni inhnehna nun nei turin a fuih bawk a. Tunlaia kan khawtlang nun min runtu, kan do mek ruihtheihthil lakah fihlim tlat a, a bawih a tlu lut lo turin mahni inthununna nun neih tum a tul thu a sawi.

Chief Minister chuan tun hnaia Mizoram chhehvel state leh thenawm rama buaina chhuak avanga zohnahthlak unaute an sahimna zawnga Mizoram rawn lut chungchang sawiin, lo tuamhlawm a an tan theih ang chen chen khawtlang, kohhran, pawl leh mimal anga hmalak a ni chu lawmawm a tih thu sawiin, Mt. Carmel School pawhin hma an lo la chu lawmawm a ti a. Hetiang ang huna khawngaihna leh unauna lantir hi thil tih ngei ngei tur a nih thu a sawi.

Kum 1962 atang khan India ramah Teachers’ Day hi kum tin September ni 5 ah lawm thin a ni a. India Vice-President hmasa ber Dr. Sarvepalli Radhakrishnan, zirna kawnga thawhhlawk tak pian ni chawia he ni hi Teachers’ Day a lawm thin a ni.