1507/2023-2024

Dated Siaha 15th August, 2023: Vawiin chawhma dar 10:30 khan District Play ground, Vaihpi, Siaha-ah India Independence Day vawi 77-na ropui taka lawm a ni a, Social Welfare & Tribal Affairs Minister Er.Lalrinawma chu khuallian niin a hmanpui.

Khuallian Er.Lalrinawma hian ‘Independence Day’ lawmna hmun a thlen veleh hian India hnam puanzar pawt pharhin Parade Contingent 18-in zahna chibai an hlan a chhanglet a, Independence Day thuchah a sawi chhunzawm a ni.

He ni lawmnaah hian khuallian chuan Siaha District mipuite leh ram puma India khua leh tuite duhsakna chibai a buk tih sawiin, India zalenna sualtu, nunna hlutak chantute chibai a buk tih sawiin British awpna dodala thih thlenga beitu Lalnu Ropuiliani leh Mizoram tana ‘martyr’ zawng zawngte zahna chibai a buk tel tih a sawi.

Minister chuan zalenna champha phak ni ropui tak alo thlen hian ram hma hun tur pawh ngaihtuah a tul a. India bakah Mizoram ngei pawh ram thang duang tak mai leh chaktak ni chho mekin, theihna pawh sang tak a nei a, amaherawhchu heng theihna te hi hmang chhuak tur chuan kan zavai a lungrual taka ke kan pen tlan a ngai a ni, a ti. Inpumkhatna tha neih theihna tur a tan, theih tawp chhuah theuh turin a sawm bawk. Heng bakah hian vantlang nun nuam leh tha, khua leh tui tin ten in ang tlang taka an neih theihna tur din zel a pawimawh tak meuh a. Chumi tur atan chuan theihna zawng zawng hmanchhuah theihna tura hmalak zel niin, zirna leh hriselna kawngah nasa taka ke pen leh hma lak mek a ni bawk a, kan tu chhuan lo kal zel tur te hrereng chunga kan ramngaw leh luidung te pawh duat taka enkawl zel a pawimawh hle a ti bawk.

Keimahni hi ropui leh chak takin hma lam panin kal mup mup mah ila, hmabak hlen zel tur kan la ngah em em a, heng hmabak kawng hrang hranga hlen tur te hi lungrual taka ke pen anih chuan tihhlawhtlin vek theih a nih thu a sawi a. Zalenna hian mawhphurhna tam tak a keng tel a ni tih hriat a tul tih sawiin khuallian chuan kan ram ‘Democracy’ lungphum veng him tur te, kan sakhaw zalenna venghim tur leh thil dang tam taka khua leh tui tha nih theihna tur atan an mawhphurhna hlen chhuah tum theuh turin kalkhawm mipui zawng zawngte a sawm a ni.

Minister thusawi kimchang zawk hi a hnuaia link ah hian chhiar theih a ni.

https://dipr.mizoram.gov.in/post/independence-day-vawi-77-na-a-khuallian-er-lalrinawma-thusawi

Vawiin Independence Day vawi 77-na lawmna ah hian Parade contingent 18 - Uniform contingent -5 leh School contingent -13 awm in, Parade Commander hi Sub-Inspector Laltlanzova, Post Commander, 3rd IR Bn, Siaha post a ni a, 2nd Commander hi Sub-Inspector Laltlanchhuaha Siaha P/S niin, ECM High School ten National Anthem an sa bawk a ni. Parade contingent te lawmman lak dan chu hetiang hi a ni:

Uniform Contingent

Pakhat na - NCC Don Bosco
Pahnih na - Mizoram Police
Pathum na- Scout & Guide, Don Bosco

School Contingent

Pakhat na -Lorrain English School
Pahnih na - Hill Gate School
Pathum na -Govt. Higher Secondary School