1669/2023-2024

Aizawl, the 26th August, 2023: Social Welfare & Tribal Affairs (SW&TA) Minister Er. Lalrinawma chuan vawiin chawhnu dar 2 khan Dr. RK Lalrosiama (L) hriatreng nana Tv Jerry Lalduhzuala, Registered Pharmacist lehkhabu ziah, natna, damdawi, vitamins, minerals leh adangte awlsamtea sawifiahna lehkhabu, 'Hriselna Huang' tih chu Tourist Lodge, Chaltlang-ah a tlangzarh.

Er. Lalrinawma chuan lehkhabu ziah leh puitlin chu thil namai lo tak a nih thu sawiin, inrintawkna nena mahni subject ngei behchhana lehkhabu tha tak Tv Jerry Lalduhzuala'n a khawrpum thei chu fakawm a tih thu a sawi a. Thu leh hla in mite thinlung awlsam taka a hneh theih thu tarlangin, 'Hriselna Huang' tih lehkhabu chuan mite a tha lam zawnga a kaihhruai ngei a beisei thu a sawi a. Damdawi chungchanga hriattur pawimawh mipui kaihruai thei tur bengvarna tam tak lehkhabua thailante chuan rah tha chhuaha hriselna, damna leh finna a tihpun ngei a beisei thu a sawi a. Ram leh hnam tana lehkhabu rawn tlak, chhenfakawm leh tangkaipui a nih ngei nana duhsakna hlanin a tlangzarh a ni.

He hun hi Nl Lalbiakremi Fanai, Registrar, Mizoram State Pharmacy Council chuan kaihruaiin Maj. Ngurthansanga Sailo in hunserh a hmang a. Lehkhabu thlirlawkna Dr. H.Lalhlenmawia, Head of Department, Department of Pharmacy, RIPANS in a nei a. Pu Lalsawma Pachuau, Jt. Director (F&D), DHS, H&FW Department, Dr. Lalhmangaihsanga leh Pu Chalneihzawna te'n thu an sawi bawk a. Pu Vanlalhluna'n Dr. RK Lalrosiama (L) hriatreng nana siam music video a tlangzarh a. Lehkhabu ziaktu Tv Jerry Lalduhzuala'n lawmthu sawiin hun hman a khar a ni.

Lehkhabu tlangzarh tak 'Hriselna Huang' hi copy 1000 chhut niin a man hi Rs 250/- a ni.