1668/2023-2024

Aizawl, the 26^th August 2023 : Health & Family Welfare Minister Dr. R. Lalthangliana’n vawiin chawhnu khan North East Indira Gandhi Regional Institute of Health & Medical Science (NEIGRIHMS) Shillong a tlawh a, NEIGRIHMS Director Prof. (Dr.) Nalin Mehta; Medical Superintendent Prof. (Dr.) C. Daniala leh thawktu dangte nen inkawmna neiin thil pawimawh hrang hrang an sawiho a ni.

Inkawmhona ah Dr. R. Lalthangliana chuan ZMC a Cardiology Department bultan theih dante sawipuiin hemi atan cheng nuai 100 hmuh anih thu Dr. Nalin Mehta a hrilh a. Health Minister in ZMC a din tur Cardiology Department tana doctor, nurse leh technician te tan a thlawna training tih sak tura a ngenna chu NEIGRIHMS Director chuan a theih ang angin hma a lo lak sak tur thu Minister a hrilh a. ZMC a Department hrang hrang te tihchangtlun leh tihphuisui nan NEIGRIHMS thiamna a bikin training tawi ang chi lam an mamawh thu sawiin hemi kawnga thawhdun theih dan kawng dap sak turin Minister in NEIGRIHMS thuneitu a ngen a, anni pawhin a theih ang anga thawhho dan kawng an dap tur thu an sawi bawk a ni. Heng bakah hian Dr. R. Lalthangliana chuan Mizoram in a neih loh critical care specialities – neurology, nephrology damlote NEIGRIHMS a inentir tura kal te chu inenkalwna tha an dawn thin avangin leh doctor ten an lo ngaihsak avangin lawmthu a hrilh a, chutih rualin Mizoram atanga NEIGRIHMS pan damlo tam zawk chu mi harsa tak tak an nih thin avangin ngaihsak leh zual turin NEIGRIHMS thuneitu a ngen bawk a ni.

Health Minister hi Mizoram House Shillong DRC Pu Lalchhanhima leh Mizoram House Guwahati DRC Dr. Malsawmtlunga Fanchun ten an tawiawm a ni.

Vawiin tlai vek khan Dr. R. Lalthangliana chuan Shillong ah Hmarchhak YMCA Chairman a nihna angin Hmarchhak YMCA Regional Committee Meeting neih chu a hmanpui nghal a. Meeting ah hian Minister chuan YMCA chu Hmarchhak ah pawl pawimawh tak anih dante sawiin Hmarchhak Kristian te inpumkhatna atan a thawhhlawk hle a ni, a ti.

Dr. R. Lalthangliana chuan nimina AYUSH Review Meeting Guwahati ah Assam CM Pu Himata Biswa Sharma nen inkawmna tawite an neih a kum hmasa lama YMCA North East Region tan Guwahati a Multi Purpose Centre sakna tur ram pe tura a ngenna chu sawichhuak lehin Assam CM chuan hemi atan ram pek hi a lo tiam a ni. Tun tum hi Health Minister in NEIGRIHMS a tlawh tum hnihna a ni.