899/2023-2024

Aizawl the 23rd June 2023 : Vawiin khan Social Welfare & Tribal Affairs Minister Er Lalrinawma chuan Mizoram State Commission For Protection Of Child Right office tlawhin thawktute nen Inkawm khawmna hun Conference Hall MSCPR-ah an nei a ni.

Minister Er. Lalrinawma chuan naupangte dikna chanvo leh humhimna kawng a hna thawk thin Mizoram State Commission For Protection of child Right thawktute chu fakawm tiin dan hnuaiah dik taka hmalak a nih zel chuan naupang chunga hleilenna awm thin chu a a tlem phah zel a beisei thu sawiin, Naupangte dikna leh chanvo humhim hi mitinte mawhphurna a ni a, Nu leh pa thenkhat mahni fate pawh enkawl thei lo an awm thin chu pawi a tih thu tarlangin naupang kumtlinglo leh rilru thianghlim tak chunga mawilo taka thil ti thinte a dem thu Minister hian a sawi a, ‘kan Pathian thuin naupangte chunga ngilnei tura min zirtir angin Nu leh Pa ten kan fate himna theuh kan ngaih pawimawh chu thil tul tak a ni’ a ti a. Social media hman dan chungchangah pawh nungchang mawi leh inzirtir tam a tul thu sawiin Minister chuan thawktute an mamawh an thlente a theih anga hmalakpui zel a tum thu a sawi bawk a ni.

Dr. Julie Remsangpui Fambawl, Member, MSCPR in an hmalakna leh an hmachhawp te presentation neiin a sawifiah a, MSCPR hi Naupangte himna turin kum 2018 khan din niin naupangten himna kawngah an dikna chanvo an hmuh theihna tura an beih dan hrang hrang leh an hmachhawp te tarlangin Hostel, Jail leh hmun dang dangte an tlawh thin thu a tarlang a ni.

Inkawm hona hun hi Dr.C. Lalsangzuala Chairperson, MSCPR in kaihruaiin Pi Lalengvari Secretary MSCPR in kalkhawmte hmelhriat tirna leh MSCPR chinchin tlangpui sawina hun hmangin Pi K.Malsawmzuali Member, MSCPR in lawmthu sawina hun a hmang a, Naupang ten harsatna an tawh chungchangah Mizoram State Commission For Protection Of Child Right biak pawhna tur hian Help line No. 6009888804 siam a ni bawk a ni.