3543/2023-2024

Aizawl, 29.01.2024: Social Welfare and Tribal Affairs, Women & Child Development Department buatsaihin Mizoram kohhran hrang hrang hmeichhe hruaitute leh Mizo Hmeichhe Insuihkhawm Pawl (MHIP) General Headquarters chuan kohhran leh inchhungkhur theuh a ruihhlo dona kawng a hmalak dan tur leh enkawl dan tur zirhona leh inrawnkhawmna vawiin khan Aijal Club Conference hall-ah an nei a. Social Welfare Minister Pi Lalrinpuii chu he hunah hian khuallian a ni.

Social Welfare Minister Pi Lalrinpuii chuan ruihhlo in khawtlang nun a thalo zawnga a nghawng nasat zia leh, ruihhlo avanga thi an tam dan te, naupang zingah ruihhlo ti tan an pun belh dan leh ruihhlo man zat a tam zel dan te a sawi a. Heng avang hian ruihhlo do hna ngawrh taka thawh thin chu tha thlah lova nasa lehzual zawka hma lak chhunzawm a tul thu a sawi a. Sawrkar pawhin ruihhlo do a ngaihpawimawh zia sawiin, sawrkar leh tlawmngai pawl thenkhat chauh tih tur a nih loh thu te, kan zavai tanrual a pawimawh thu a sawi. Minister Pi Lalrinpuii chuan khawtlang nun siamthat kawnga hmeichhiate pawimawhna sawi telin, ruihhlo do kawngah pawh nasa takin sul an sut kuak theih tur thu a sawi. Khuallian chuan naupang leh thalai zawk te ruihhlo laka venhimna kawnga zirtir tur hian mawhphurhna sang tak kan nei theuh ani tiin ruihhlo ti mek te chhanchhuahna kawngah pawh thahnemngai taka lo pen chhuak zel turin kal khawm te a sawm a ni.

Vawiin inrawnkhawmna kaihruaitu Dr. Lalhriatzuali Ralte, Director, Social Welfare & Tribal Affairs Department chuan ruihhlo in a bik takin naupangte a run nasat tawh zia te, chhungkaw nun atanga inzirtirna bultan a pawimawh thu te, thahnemngai taka ngawrh lehzuala ruihhlo do hna thawh a tulzia te a sawi a, vawiin inrawnkhawmna chuan rah tha a chhuah ngei a beisei thu a sawi.

He hunah hian Pi Lalhlupuii Sailo, CEO, MSD&RB, Social Welafre & Tribal Affairs Department chuan Mizoram a naupang leh ruihtheihthil inkaihhnawihna (Child Drug Survey) chungchang ah presentation pe in, Pi Vanlalhruaii, MSD&RB, Social Welafre & Tribal Affairs Department hnen atangin kohhran leh pawl theuha ruihhlo dona leh ruihhlo hmansual laka invenna kawnga hma lak dan tur zirtirna ngaihthlak a ni.

Presentation a tarlanah Mizorama kum 2022 a school 122 a zirlai 10733 (kum 10 -17) zirchianna ah ruihtheihthil eng chi pawh vawi khat tal ti tawh an awm em tih zawhna chhanna atanga a lan danah high school leh higher secondary school zirlai aiin middle school kal zingah ti an tam zawk a. He zirchianna atang hian rilru hriselna leh chhungkaw khur boruak leh zu/ruihhlo inkaihhnawihna te, naupang ruihtheihthil khawih te hian puitling ruihtheihthil khawih ang tho an hmang zia te a tilang a ni.

He inrawnkhawmna ah hian Central Kohhran Hmeichhe Hruaitute (Mizoram Synod) Mizoram Baptist Kohhran Hmeichhe Pawl (MBKHP), Territorial President of Women Ministry (Salvation Army), Diocese Catholic Hmeichhe Pawl, General Ladies Auxiliary Department, North-East India (UPC), General Ladies Auxiliary Department, Mizoram (UPC), Administrative Secretary, Lairam Isua Krista Baptist Kohhran Hmeichhe Pawl, Women Ministries Mizo Conference of Seventh Day Adventist, Evangelical Church of Maraland Krizypa No Py (KNP) MHIP leh MCHP General Headquarters atangin Office Bearer leh aiawh 45 vel an kal a ni.