3544/2023-2024

Aizawl 29th January,2024: Vawiin ni 29.1.2024 (Thawhtan) tlai dar 3:00 Pm khan Fisheries Minister, Pu Lalthansanga Pisa-ah, Fisheries Department leh Central YMA te chuan kan ram lui a Nungchate an lo inthlahpun zel theih nan leh awmze nei leh tha zawk a humhalh a nih theih nan Thawhhona Thuthlung Kum hnih chhung atan an ziak.

Hetiang Thawhhona Thuthlung hi Kum 2021 khan ziah a lo ni tawh a, hlawhtling taka kalpui niin Luidung Nungcha humhalh kawngah pawh nasa takin hmasawnna hmuh tur a lo awm tawh thin a ni. Mizoram Fisheries Act, 2002 leh Mizoram Fisheries Rules, 2019 hian phalna nei lo a luidung nungchate man leh an chenna hmun ti buai leh ti bawlhhlawh zawng a hma lak hi a khap tlat a, he thawhona hmasa neih chhung hian Mizoram Fisheries Act leh Rules hnuaiah dan bawhchhia mi 27 te hremna pek lo ni tawhin nikum YMA Khawmpui lian, Biate a neih ah khan luidung humhalh ṭha YMA Branch pathum(3) Khawzawl Vengthar Br, Khawbung Br, Darlawn Venghlun Br leh YMA Group 3 Chalfilh group, Tuipuiral group leh Hmuifangtlang group te hnenah lawmman pek a ni bawk.

Vawiin a Thawhhona Thuthlung ziahna hun hi Pu C. Lalzahngoa, Secretary, Fisheries Department in a kaihruai a, Pu Lalthansanga, Hon’ble Minister, Fisheries Department in hman puiin, thu a sawi a. He thawhhona thuthlungah hian Fisheries Department aiawhin Pu F. Vanlallawma, Director, Fisheries Department leh CYMA aiawhin Pu Lalhmachhuana, President, CYMA in hming an ziak a, thusawina hun an hmang bawk ani. Pi Zonuntluangi, Deputy Director in lawmthu sawina hun hmangin hun a khar. He thawhhona hi kum 2 chhung atana ziah ani a, chhunzawm leh zel theih tur a duan ani.