3545/2023-2024

Dated Serchhip, the 29th January, 2024: Vawiin khan Serchhip DC Pu David Lalthantluanga, Competent Authority for Land Acquisition (CALA) hovin Serchhip DC Meeting Hall-ah khaw hrang hrang VC te, NHIDCL hotute leh sawrkar official ten NH54 kawngpui laih meka zangnadawmna la tawh, in thiat duhlo te chungchang an sawiho a. January 31, 2024 hian magistrate kaihhruaiin in thiah ngai te leh kawng siamna dala bungraw dah te hnawl sawn hna thawh ni se, tiin an rel.

Vawiin meeting-ah hian Chhiahtlang, Khumtung, Baktawng, Chhingchhip, Keitum leh Bungtlang VC te an tel a. Zangnadawmna la tawh, an in te thiat tura vawi duai lo hriattirna pek tawh te chungchang sawiho a ni a. Vawiin hian case 20 chuang chhawpchhuah niin uluk taka sawiho a ni a. An harsatna tawh dan te chipchiar taka sawiho niin, complain thehluttu thenkhat te chu anmahni ngei meeting ah hian koh an ni a, an harsatna tawh dan te sawifiah tir an ni.

NH54 kawngpui siam hna hi March 31, 2024 ah zawhfel tura tih a nih avangin Central Sawrkar lam atangin nasa taka nawrna a awm tawh a. Chutihlaiin, in thiat duh lo leh hnathawk tute thawhna dal mi tlem te an la awm a. Heng avang hian hnathawh engemawchen a sukuk lo thei lo a. District Administration chuan vawi engemawzat an chungchang thu a ngaihtuah tawh a, zangnadawmna la tawh te hi eviction order pe in, a hmunah kal chilh an ni a, lehkha pawh vawi engemawzat pek an ni tawh a ni.

Assessment tih hmaih avanga zangnadawmna la ngei tur, la ve rih lote chungchang pawh sawiho niin District Administration chuan zangnadawmna an lak ngei theih nan hma a la dawn a. Kawngpui siam avanga feh kawng internal road mimal leh vantlang thil tihchhiat tepawh repair sak emaw a man hu sum fai NHIDCL in an pe dawn tih meetingah hian sawi a ni bawk a. Amaherawhchu, sum leh pai an dawn tur ang dawng kim tawh, mahni in la thiat duh lo te erawh chu an chungah dan angin action lak a ni dawn a. Magistrate te kaihhruaina hnuaiah Team 4 ah inthenin January 31 hian khawl hmangin in thiahsak an ni ang. An in te thiahsak an nih bakah IPC Section 188 tlawhchhanin heng mite hi case awrh tir an ni dawn bawk a. Hetiang a thlen lohna tur hian District Administration chuan an in te thiat vek turin a hriattir nawn leh a ni.