3546/2023-2024

2024 Pawlkut thla ni 29: Mizoram Sawrkara Agriculture Minister Pu PC Vanlalruata chuan vawiin khan Thingdawl Agriculture Farm, Krishi Vigyan Kendra (KVK) Kolasib hmun leh District Agriculture Office te a tlawh a. KVK Kolasib ram sah thlak tuma hma lakna chu a hmunah tlawhin a enfiah nghal bawk.

Agriculture Minister Pu PC Vanlalruata hi Kolasib District Deputy Commissioner (Bawrhsap) Pu John LT Sanga hovin department official leh thawktute, journalist-te leh ZPM hruaitute'n an lo dawngsawng a. He'ng hmun hrang hrang a tlawhnaah hian thawktute nen hma lakna hrang hrang an thlir ho a ni.

Agriculture Minister chuan kut hna thawktute hlawhtlinna leh din chhuahna atan sawrkarin theih tawpin hma a la dawn tih sawiin, kut hna thawktute hamṭhatna chu sawrkarin a ngaih pawimawh ber pakhat a nih dawn avangin Agriculture Department hming pawh Agriculture & Farmers' Welfare Department tia thlak tuma hma lak mek a nih thu a sawi a. Kut hna thawktute'n an thil thar chhuah hralhna tur (market) ṭha tak a awm sa tih hriaa ngaihngam taka hma an lak theih nan market ngaihtuahsak an ni dawn a, kum tharah market eng emaw zat puan belh tum a ni tiin, thil thar lei tur zingah buh lei tel tuma hma lak a nih tur thu leh ram neih chungchangah inkhuahkhirhna felfai zawk a awm theih nan Mizorama leilet leh huan ram neitu zawng zawng khawl hmanga chhinchhiah (digitalise) tum a nih thu a sawi bawk.

Agriculture Minister chuan sawrkar hma lakna hrang hrangah hmasawnna ngelnghet leh tlo zawk a awm theih nan zir chianna leh zir bingna (research) behchhanin hma lakna kalpui a ni dawn tih a sawi a. Thawktu indaih lohna nasa tak a awm chungin, hna lak belh theih a nih hma chu thawktu awm sate'n hna thawh tur a lo tam deuh a nih pawhin ṭhahnem ngai lehzuala an thawh a beisei thu a sawi a. Kolasib KVK ram mimal tana sah thlak tuma hma lakna chungchangah DC aṭangin hma la chhunzawm lo turin stay order chhuah a nih tawh thu sawiin, kut hna thawh thil chawi san a nih theih nan leh sawrkar aṭanga hmasawnna tura hma lakna atan sawrkar ram awm sa chu roh a ṭul avangin ram sah thlak chu phal a ni dawn lo va, ram pek tuma hma lakna awm sa pawh sut vek a ni dawn tih a sawi a. Chutih rual chuan chenna in leh lo nei lote chu thlaphang lo tura chahin, an dinhmun chu sawrkarin a ngaihtuah tur thu a sawi a ni.

Kolasib Bawrhsap Pu John LT Sanga chuan Agriculture Minister-in Kolasib a tlawh chu District tan leh department leh kut hna thawktute tan a lawmawmin a phurawm hle a ni, a ti a. KVK ram buai a hmun ngeia a hmuhpui chu thlamuanthlak a tih thu a sawi bawk.

Agriculture Minister hian Thingdawl Agriculture Farm-a hna thawh mek pahnih - NABARD RIDF sum ₹ nuai 150 hmanga Seed Processing & Seed Storage Unit sak mek leh ₹ nuai 258.89 senga Solar Powered Cold Storage for Potato Seed sak mek te chu a hmunah tlawhin a enfiah nghal a. He'ng hna pahnihah hian civil work chin chu thawh zawh tawh niin, a pum puiah 50% vel chu zo tawh anga ngaih a ni a. A khawl bun tur leh a cheibawlna tur hmabak a la ni a. Minister chuan ram tana rotling tur hma lakna a nih angin hna ṭha taka chhunzawm a, zawh thuai tum turin thawktute chu a chah a ni.

Agriculture Minister-in KVK Kolasib a tlawhnaah Senior Scientist & Head Dr Michelle C. Lallawmkimi chuan hun kaihruaiin, KVK Kolasib hma lakna report a pe a. Minister-in DAO office a tlawhnaah District Agriculture Officer Pu Lalringliana chuan hun kaihruaiin, Kolasib District-a agriculture kaihhnawiha hma lakna hrang hrang report a pe a. He hunah hian FOCUS Kolasib District Project Manager Pu Lalremruata pawhin FOCUS hma lakna report pein, AH & Vety, Soil, Agriculture leh Horticulture hnuaia kut hna thawktute hma laknaah ṭanpuina hrang hrang an pek ṭhin thu leh Kolasib District-ah an hamṭhatna atana kut hna thawktu inhlawm khawm pawl, Farmer Interest Group (FIG) 612 an awm thu a sawi a ni.