2135/2024-2025 

AIZAWL; the 19^th September,2024: Vawiin  chawhnu dar 3:00 khan  cheng nuai ₹200 senga sak Govt. T.Romana College, Tribal Girls’ Hostel  building thar chu Pi Lalrinpuii, Social Welfare & Tribal Affairs Minister chuan khuallian niin a hawng. Tribal Girls’ Hostel hi Gov't. T. Romana College Campus thlang, ITI  venga college ramah sak a ni. Building thar hawnna inkhawm tawi hi Pu R. Lalremliana, Vice Principal chuan a kaihhruai a ni.

College campus-ah building thar lawmna pual inkhawmna hun neih chhunzawm a ni a, Pu H. Lalnunmawia, Associate Professor in a kaihruai a ni. Dr. Jenifer Lalbiakdiki, Principal chuan kalkhawmte lawmna thu sawiin, college than chhoh dan; a bikin Girls’ Hostel a lo puitlin theih nan hmalak chhoh dan te a sawi a ni.

Khuallian Pi Lalrinpuii Minister chuan  Gov’t. T. Romana college lo in din chhoh dan leh a bikin mi harsa zawkte tan malsawmna anni thin chu ropui a ti thu a sawi a. Zirlaite chu mahni inthunun (self-discipline) leh hun vawn dik (time management)  thiam turin a fuih bawk a ni.  Vawiin a hawn Tribal Girls Hostel hi tangkai taka hmeichhia, a bikin harsa zawk ten an hman tangkai theihna turin duhsakna a hlan a ni. Minister hi Pi Lalhriatpuii, Director leh Dept. hotute'n an tawiawm a ni.

 Pu Lalthankima, A.E., SW& TA Dept.  chuan Technical Report peiin, Tribal Girls’ Hostel sakna hi Article 275(1) hnuaia Ministry of Tribal Affairs hnuaia Special Assistant to Tribal Sub Scheme atanga lo kal sum a nih thu a tarlang a.  A sak hna hi   December, 2019-ah khan tan a ni a. Covid vangin a khaihlak deuh a, October, 2023 khan sak  zawh fel a ni. Building hi floor 3 niin, a pumpui  zau zawng hi 587.84 sq.m a ni. Nakinah mamawhna a awm takin lift well pawh dah a ni bawk. A satu contractor hi Royal Consultancy Service, Mission Veng te an ni.

Pu Lalnunzira, Associate Professor in Hostel thar hi tawngtaiin a hlan a, a tawp khar nan Pu C. Laldinsanga’n lawmthu sawinna hun a hmang a ni.