2137/2024-2025

Aizawl, 19.09.2024: Aizawl DC Er. Lalhriatpuia hovin vawiin tlai khan DC pisaah Sairang Dinthar khawtlang hruaitute nen district hotulu hnena an thuthlen ngaihtuahin Sairang a rel kawng siamtu NF Railway aiawhte nen an thukhawm.

Sairang Dinthar VC chuan DC hnenah hian thu thlenin, FCI kudam sak mek kaltlanga vantlang kawng rei tak an lo hman tawh, Kangtek Kawng chu railway construction company ten bungraw phurh nan an tawm avangin leh a bulhnai mimal ram pawh an nek tel avanga khawtlang mi tam tak eizawnna leh in leh lo in a tawrh phah thu thlenin, hmalak sak turin an ngen a. Hemi chungchangah hian uluk taka sawihona neiin railway construction company te chuan October ni 20, 2024 thleng hun pe tura ngen a, chumi chhung chuan kawng siam hna leh a tul dangte theihtawp chhuaha an lo thawh tur thu an tiam a ni.

Hemi bakah hian railway construction company lamin rel kawng atana ram an lei tawh chhungah mimal dawr te siam pakhat a awm avanga hna a thuanawp thu meeting ah hian an thlen bawk a. Aizawl DC, District Magistrate ni bawk chuan dawr siamtu chu a rang thei ang bera titawp turin leh, September ni 30, 2024 hnuah an la inthiarchhuah loh chuan thiah sak a nih tur thu a ti tlu nghal a ni.