2164/2026-2027

Dated Aizawl, the 10 September 2026: Vawiin khan Social Welfare, Women & Child Development Department changtu Minister Pi Lalrinpuii chuan Dawrpui Multi-purpose Hall, Aizawlah, Poshan Maah 2026 leh Project Genesis: protein-rich Food Campaign-te chu khuallian niin a hawng.

Hawnna puala hun hmanah hian khuallian, SW,W&CD Department changtu Minister Pi Lalrinpuii chuan thusawiin, kum 2015 atanga Prime Minister Flagship Programme pakhat ‘Beti Bachao Beti Padhao’ hnuaiah kum tina hmeichhiate hriselna lam hawi a hmalakna kalpui thin chu kuminah pawh Project Genesis hmingin nausen hmeichhiate nunna hlu tak humhimna lam hawi a kalpui leh a ni a ti a. BBBP leh Health Department te chuan hemi atan hian Nu nau pai zawng zawngte chu za a za damdawi inah inentir a, nau pawh damdawi inah ngei nei turin an duh tih sawiin, hetih rual hian Mizorama District thenkhat Siaha, Mamit, Lawngtlai leh Lungleiahte chuan hei hi zaa sawmsarih atanga sawmriat vel a la ni a ti a. A chhan dang dang zingah inkal pawhna kawng tha tawk lo te, damdawi in hnai vai awm rem chang lo te, chhungkaw khawsak harsat vangte leh awareness la that tawk loh vangte a ni tih Minister chuan sawiin, chumi tiziaawm a hmasawnna chak zawk thlen ngei beiseiin, Sawrkar chuan Project Genesis chu kalpui ta a ni tih a sawi a. ‘genesis’ tih chu ‘bultanna’ a nih ang takin, nunna bul lo intanna chu ngaihpawimawh a tul zia tih lan nan leh chumi atana theitawp chhuah tura Project Genesis chu thlang an ni tih Minister hian a sawi bawk.

Minister chuan Project kalpuidan turte leh Project-in a tumte sawifiahin, Project Genesis hnuaia hmalaknate chu Deputy Commissioner, Health & Family welfare Department leh Women & Child Development Department te tangkawpin kum khat chhung kalpui tur a nih thu a sawi a. a theih chin chinah Department hrang hrangte nena thawkho chungin, convergence-a hmalakna reng rengte chu kalpui tum a ni a ti a.

Project-Genesis hian a tum berte chu:

i) Nau pai tih hriat ruala inchhinchhiah nghal - 1st Trimester ANC Registration 1% tala tihpun leh

ii) Damdawi In ngeia nau neih - Institutional Delivery 95% aia tlem lo thlen tumte a ni tih Minister chuan a sawi a.

ASHA, Anganwadi Worker, Health Worker, Village Council leh NGO zawng zawngte chu nu nau pai ten damdawi in pawimawhna an hriat chian leh zualtheih nana theihtawpa tan la tura fuihin, Project Genesis chu a bik taka duan scheme a nih angin, Mizoram chuan tangkai taka a hman ngei a beisei tih a sawi a ni.

He huna thusawitu dang Pi Flora Laltanpuii Deputy Director, W&CD pawhin, Poshan Maah leh Project Genesis chungchang bakah BBBP chungchangte a sawifiah a. Kumin Rashtriya Poshan Mah vawi 9-na leh a thupui ‘HAMARI ANGANWADI HAMARI JIMMEDARI’, Mizo tawng chuan ‘Kan Anganwadi, Kan Mawhphurhna’ tih leh thupui peng (sub-theme)-te a sawifiah a. Poshan Maah 2026 hlawhtlin theih nana theihtawp chhuah theuh turin kalkhawmte chu a chah nghal bawk.

Kumin Poshan Maah puala thupui peng (sub-theme) thlan chhuahte chu:

1. Taksa hrisel nana tangkai chauh ei leh in tura inzirtir (Dietary Diversity & Adequate Protein) te,

2. Anganwadi Centre-ahte ei tur tharlam chauh chhawpsak (Fresh Hot Cooked Meals at Anganwadi Centres) te,

3. Mipui vantlang mawhphurhna inhrilhhriat (Community Ownership & Accountability) te,

4. Naupang thanglai leh nausente hmasawn chak thei ang ber tura enkawl leh ei leh in hrisel pek (Nutrition and Early Stimulation for Childhood Development) leh

5. Pradhan Mantri Matru Vandana Yojana: nu naupai leh nau neite nena pawisafai hlante a ni.

Vawiina hun hman hi Pi Zoramthangi Chhangte, Women & Child Development  Director chuan kaihruaiin, kalkhawmte lawmna thu a sawi a. Pi Flora Laltanpuii, Deputy Director, W&CD chuan Project Genesis kalpui tura ruahmanna leh hmalaknate presentation hmangin a sawifiah a. Hemi zawh hian eitur hrisel siamdan a taka entirna (cooking demonstration) neih chhunzawm nghal a ni a. Dr. Lalhruaitluangi Chhangte, Deputy Director, W&CD chuan lawmthu sawiin hun hi a titawp a ni.