Ram pum huap Socio-Economic & Caste Census 2011 (SECC 2011) neih mek chu Mizoram ah 16th January, 2012 (Thawhtanni) atangin tan a ni dawn a. Aizawl Town Charge hnuaia Enumeration Block 2 leh Kolasib Town Charge a Enumeration Block I ah te bul tan a ni ang.

Mizoram pumpui ah hian Enumeration Block 2241 a awm a, heng zinga Block 1239 chu Rural Enumeration Block niin Block 1002 chu Urban Enumeration Block a ni.

He chhiarpuia hnathawk tur atan Enumerator 807 leh Supervisor 229 ruat fel an ni tawh a, training tul ang ang pawh pek vek an ni tawh. Tun tum chhiarpui ah hian khawl (Tablet PC) hman tur a ni a. Hemi buaipui leh thawktu lak leh training pek te hi Electronic Corporation of India Ltd. in an buaipui a. Enumerator ruat te leh Data Entry Operator atana ruatte hian a ruala in tina kalin chhiarpui hi an thawk dawn a ni.