Chief Minister Pu Lal Thanhawla chuan vawiin khan Federation of Mizoram Government Employees & Workers General Conference vawi 27-na Vanapa Hall-ah a hmanpui.

Chief Minister chuan Mizoram sorkar hnathawkte chu mi pawimawh tak tak, lehkhathiam awmkhawm leh kohhran mite vek an ni a, neitu rilru pu chunga hna thawk in, mipuite kaihruai thei tu an ni a ti a. Mizoram chu state te tak, a mi chengte pawh tlemte, mahni intodelh lo tak kan ni a, chuvangin sorkar hi engkima thil min tih saktu leh mi zawng zawngte innghahfakna a ni a ; eizawnna hna petu lian ber a nih bawk avangin sorkar hnathawk tamna ber state kan ni a ; chuvangin central sorkar thurawn angin sorkar hnathawk tih tlem hi kal chhohpui a ni a ti. Sorkar hnathawkte hlawh lakna hi Non-Plan hnuai a mi tur anih laiin Plan Head atanga hlawh la an tam avangin development scheme te duh angin a kalpui chak theih loh a ni a ti.

Chief Minister chuan sorkar in 6th Pay a hman ve tak avangin sorkarin nasa taka a harsat phah thu sawiin, harsa chungin kan in chhawmdawl chho a ni a ti a. Chuvangin kan hlawh hen hian hna kan thawk em, tih kan inenfiah fo a tul hle a ni a ti. Sorkar hnathawkte hian sorkar dinhmun dik tak an hriat a tul thu sawi bawkin, Chief Minister chuan an phu ang tawk chu pek vek sorkarin a duh a ni tiin, nuar zawnga innawr chi a nilo a ni a ti a. Intodelhna kan neih theihna kawngah leh tam zawk kan thawh chhuah theih nan sorkar hnathawkte chu a hmanrua an ni a, an thawhrimna atang hian mipuite an kaihruai thei a ni a ti.

Miretheite leh thingtlang mi, lonei mi leh kuthnathawktute chhawmdawlna tura central atanga scheme hrang hrang lo kal te leh NLUP scheme te hi anihna tur taka hman a nih theih nan, a thawktu te hian dik taka kan kenkawh a ngai a ni tiin, Chief Minister chuan heng sum lo kal te hi kan lo it ve a thianglo a ni a ti.

Chief Minister chuan sorkar kan inthlak thin a, mahse a hnathawktute chu inthlak ve ngailo, sorkar neitu dik tak an ni a, politics a awm ve lo turin a chah a. Ruling party a rinawmna nghah a tul loh thu sawi bawkin, sorkara an rinawm kha a tawk a ni a ti.

Chief Minister chuan sorkar hnathawk kalkhawmte chu kumthar chibai buk in, kumin hi midangte tana malsawmna ni theuh tura an hna thawk turin a duhsakna a hlan a ni. Hruaitu thar inthlanna an neih turah felfai leh thianghlim taka inthlanna kalpui turin a chah bawk a ni.

FMGE & W hi Mizoram sorkar hnuaia hnathawk zawng zawng intelkhawmna a ni a, kum 1973 November ni 24 khan a lo ding tan a ni. Vawiin a Conference ah hian rorel tur agenda 8 (pariat) an sawiho a ni.

Conference session hmasa hi Pu T. Rohmingliana, Sr. Vice President, FMGE&W in a kaihruai a, chawhnu second session hi President Pu T. Sangkunga’n a kaihruai thung a ni.