Panchayat Mahila Shakti Abhiyan (PMSA) buatsaihin vawiin khan I&PR Conference Hall-ah “Dialogue on Women in Politics : Issues & Challenges” tih thupui hmangin sawihona neih a ni a. Women in Governance (WinG), Mizoram bultum he sawiho hi PMSA President Pi Zothankimi’n a kaihruai a, mipui thlanchhuah hmeichhia te, party hrang hrang aiawh hmeichhiate leh mithiam engemawzat an tel.

Parliamentary Secretary Pu S. Laldingliana chuan he hun hi hmanpuiin Mizo hmeichhiate chu kawng tinrengah mipate el pha an ni tawh a, politics khelh chungchangah ngat phei chuan duhthlanna leh inpekna chiah an bak tawh a ni, a ti. Mizo khawtlang nun leh politik chu hun hnih - Kristian hma leh Kristian hnu - ah a then theih a. Hun hmasaah chuan hmeichhiate dinhmun a chhe hle a, amaherawhchu tunah zet chuan hmeichhia te hi thiltithei tak, lehkha zirnaah pawh mi chung en, an hnathawhnaah pawh hlawtling tak tak te an nih tawh avangin hmeichhia nih vang ringawta insit leh kiltawih a hun tawh lo hle a ni, a ti bawk. Mizoram-ah phei chuan mipa aiin hmeichhe vote nei an tam zawk a, hmeichhiaten tanrual an thiam phawt chuan politics-ah pawh dinhmun sang tak an hauh theih ngei a rin thu a sawi a ni.

Prof.Lalneihzovi, Adviser, PMSA chuan rampum leh state politics-a hmeichhiate dinhmun tlangpui a tarlannaah India ramah central, state leh sorkar enkawl pawl hrang hrangah hmeichhe hnathawk an tlem hle a; Mizoramah pawh sorkar hnathawk zingah 23.61% chauh hmeichhia niin mipa chu 76.39% an ni a. Kum 2005-a chhinchhiah dan angin Group A-ah pawh hmeichhia 579 an nih laiin mipa chu 2369 daih an ni thung.

Kum 1992 khan rampum inrelbawlnaa mipui leh hmeichhiate chanvo tam zawk a awm theih nan 73rd leh 74th Constitutional Amendment Acts te pawm an lo ni tawh a. Mizoramah he Act-te hi hman an la nih loh avangin vawiin thlenga politics khawvela Mizo hmeichhiate thathawh a la beitham hle a ni. Village Council level-ah hmeichhiaten 2% bak an luah pha meuh lova, District Council hun laiin 0.23% chauh a ni a, UT hunlai khan 6.06% kai phain state nih hnu tunah phei chuan tlahniam lehin a san lai berin 0.4% a ni a, a hniam lai berin 0% a ni hial a ni. National level politics-ah Mizo hmeichhia lan lai a la awm miah lo bawk a ni.

Vawiin sawihonaa telte chuan Mizo hmeichhiate zingah politics lam inhrilhhriat tam a tul thu leh 33% reservation awm hi a theih anga zauva chhawr tangkai a tul tak zet tawh thu te, hmeichhiate hmasawn nana ram leh khawtlang inrelbawlnaah tun aia nasa zawka inrawlh leh hmalak tul thu te sawiho a ni a. PMSA hian Local Council leh Village Council-ah hian 33% aia tlemlo seat hmeichhiate tana hauhsak turin Chief Minister hnenah lehkha an thehlut a ni.