India ram puma chhung tinte hnen atanga lak, Socio - Economics & Caste Census 2011 chu Mizoramah pawh tukin zing khan bul tan a ni. A bul tan nan Larsap Pu Vakkom Purushothaman leh Chief Minister Pu Lal Thanhawla te chhungkua ah neih a ni.

Socio Economics & Caste Census 2011 hi India khua leh tui dik tak chhung tinte khawsak dan enfiahna tur a ni a. Central sorkarah chuan Ministry of Rural Development chu Nodal Ministry a ni a. Mizoramah chuan General Administration Department (GAD) chu a khaikhawmtu Nodal Department a ni. Thingtlang lam, Rural Areas chu Rural Departmentin hma a la anga ; khawpui lam, Urban Areas chu Urban Development & Poverty Alleviation (UD&PA) in hma ala thung dawn a ni. Census hi India ram hmun tam zawhah chuan zawh fel tawh a ni a, Mizoramah erawh chuan chhung tinte hnen atanga thil hriat duh dah khawmna, khawl te takte paperless hand held device an tih mai hi a rawn thlen tlai avanga bul tan tlai a ni.

Tukin zinga Larsap leh Chief Minister te chhungkua census neihna ah hian UD&PA Director Pu K.Lalthawmmawia leh khawlte ‘Hand held device’ buaipuitu Electronics Company of India Limited (ECIL) a thawkte an tel a ni.

Ram pumpui huapa mitin sum leh pai leh khawsak dan dinhmun hriatfiah nan Chhiarpui, Socio-Economic and Caste Census, 2011, chu neih a ni dawn a. Mizoram-ah chuan he Chhiarpui hi chhawng 3 (thum) a kalpui tur a ni a. Aizawl leh Kolasib district ah chuan ni 16.01.2012 atanga 03.02.2012 chhunga zawh tur a ni a; Champhai, Mamit leh Serchhip district ah te chuan ni 13.02.2012 atanga 02.03.2012 chhunga Chhiarpui hi neih tur a ni a ; Lawngtlai, Lunglei leh Saiha district ah chuan ni 12.03.2012 atanga 30.03.2012 chhunga chhiar zawh tur a ni ang.

He Chhiarpui neih chhung hian Enumerator leh Chhiarpui hna thawktute tha thei ang ber a lo tawiawm turin leh zawhna te dik taka lo chhang turin mitin te an ngen in an hriattir a. He Chhiarpui hi ram hmasawnna tura ruahmanna chi hrang hrang siamna atan behchhan pawimawh tak anih dawn avangin chhungtin ten kan dinhmun dik tak lo hrilh hre tura ngen kan ni.