Ni 13.1.2012 khan Mizoram State Law Commission chuan an Chairman Pu R. Lalrinawma, MLA hovin Report 2-na Law Minister Pu Lalsawta hnenah an thehlut.

He Report in a tarlan danin Section 144 Cr. P.C. hman sualna a tam hle niin a lang. Hun engemawti atang khan District Magistrate ten Section 144 Cr. P.C. hmanga khapna thupek an chhuah thin hi sawrkar beng ti thlep thei thil awm thin a. Sawrkar pawhin a ngaimawh viau a, mahsa hmalatu fumfe awm loh avangin a zuzi thin a Law Minister Pu Lalsawta’n hemi chungchang lo zir chiang a, sawrkara rawtna fumfe tak thlen turin Law Commission chu a ngen a, a ngen angin Law Commission chuan uluk takin a zirchiang ta a ni. District Magistrate pariat (8) Order chhuah te ensakin a kaihhnawih Department te pawh comments a dil bawk a. District Magistrate te ngei pawh zawhna thenkhat an comments a dil angin an thehlut hlawm bawk a. Heng zawng zawng te zirchianna atanga a lan danin Section 144 Cr. PC. hi nasa taka hmansual niin Law Commission chuan a ngai a ni. Chumi tichiang tur chuan zu khapna Dan MLTP Act, 1995 khauh taka kenkawh anih laiin Kolasib District Magistrate chuan kum 2008- 2009 chhung khan thla 16 chhung tehmeuh Section 144 Cr. P.C. hmangin zu khapna Order a chhuah a, MLTP Act, in kum 5 thleng hrem theihna a neih laiin Section 144 Cr. P.C. hremna chu a rei berah thla khat chhung lung in tan a ni. Hei hian a entir chu Dan dinglai kalhin Order chhuah a ni a, Dan dinglai tibawrbang a. Dan siamtute zahlohna a ni thei bawk. Supreme Court phei chuan Section 144 Cr. P.C. hnuaia vawi khat aia tam Order chhuah nawn chu he Dan tum piah lam leh thuneihna hmansualna a ni a lo ti daih tawh nghe nghe.

He Report phek 22 a chhahah hian District Magistrate te chu Section 144 Cr. P.C. hnuaia Order an chhuah duh a nih pawhin tul bik te ah leh chhan tha tak neiin a dan tum piah lam thleng lo ngei tura chhuah thin turin Recommendation a siam a ni. Commission hian hna tam tak thawk mahse subject thlan bik teah chauh Report a siam thin a ni. Pu R. Lalrinawma hi he Commission Secretary Pu Zahmingthanga Ralte leh member dangten an tawiawm ni.