106/2024-2025 

Aizawl, the 9th April: Vawiin khan Pu KV Chandra, Deputy Director and Officer-in-charge, Software Technology, Parks of India, Aizawl, Mizoram chuan Governor Dr Hari Babu Kambhampati chu Raj Bhavan-ah a hmu.

He hunah hian Governor chuan Software Technology Parks of India (STPI) in a Mizoram thalaite entrepreneurship lama an luh theih dan kawng hawnsak an tum dante a zawt a, STPI hnathawh leh hmalak tum dan chu mipui hnenah thuthar thehdarhtute hmanga puang zar turin thurawn a pe bawk a ni. Pu KV Chandra chuan Governor chu STPI hmalaknate a sawipui a, Mizoram University (MZU) leh National Institute of Technology (NIT)-a zirlaite nen open channel programmes leh social media hmanga inpawtawnna an neih thin thute a hrilh.

Department of Information Technology & Communication (DITC), Govt of Mizoram nen tangkawpin STPI chuan Thuampui, Aizawlah centre 4690.62 sq ft a zau din a, STPI Aizawl chu ni 11th August 2018 khan Guwahati Directorate in Mizoram hnuaiah din a ni.

STPI Aizawl centre chuan Plug & Play incubation seats 53, Internet chak tak, Conference Room, kawlphetha chawl loa hman tur, Captive DG Power system leh ‘Gaming & Entertainment’ lama insawrbing Centres of Entrepreneurship (CoE) a nei a, tun dinhmunah hian CoE Aizawl atan start-ups 10 thlan chhuah a ni. STPI Aizawl chu programme hrang hrang job fair, outreach programs etc-ah te an tel thin a, heng hun hi STPI chuan STPI Aizawl leh start-up program OctaNE hnuaia an bungrua leh hmanraw neih thatte pho lanna remchangah a hmang thin a ni.

Pu KV Chandra hi STPI officials dang Pu Sunit PIllai, Project Associate leh Pu Kumar Pal, Technical Officer ten an tawiawm a ni.