Mizoram sorkar thara Soil & Water Conservation Minister Pu Lalrinmawia Ralte hovin vawiin khan Soil & Water Conservation Directorate-ah officer rualten inhlantharna hun an hmang.
Pu Lalrinmawia Ralte chuan Soil & Water Conservation department hnathawhte chu khawvel pawhin a ngaihmawh em em leilung hang luangral tur ven leh humhalh te, leilung chereu zel avanga khuarel chhiatna hrang hrang thleng thei ven te an ni, a ti a. Khawvel hmasawnna leh thiamna thang zelah thil thar tha leh tangkai zawk ngaihtuah chhuah thiam te, sorkar hmalakna thuang hrang hrang inkawprem taka thawhho thiamte chu tun huna kan mamawh zualpui tur leh hmachhawp ni se a duh thu Minister hian a sawi a. Hmasawnna kawngah hian mi pakhat chauhvin zan khat thil thua thil inthlakthleng lian tham thlen tir thut theih a ni ngai lova, tanrualna, thawhhona tha nen a sakal te a hlenchhuah chi a ni zawk, Minister chuan a ti.
Inkhawm kaihruaitu Soil & Water Conservation Director Dr Jerome Rokima pawhin an department dinhmun tlangpui, an hmalak mekna leh hmachhawpte a tarlang.
Soil & Water Conservation department-ah hian tun dinhmunah gazetted officer 39 leh staff 345 an awm a. Mizoram sorkar flagship programme NLUP hnuaiah hian trade pathum - hmunphiah, coffee leh rubber plantation-te an kalpui a ni.
Inhlan tharna programme-ah hian Soil & Water Conservation Secretary Pu K Thanzama pawh a tel a ni.
