Nimin khan Chhim Veng YMA Hall, Mamit-ah Mamit bial atanga Cabinet Minister hmasa ber Pu John Rotluangliana MLA lawmna Programme ropui takin hman a ni a, He hun hi Pu V. Lalremthanga IAS, District Bawrhsap in a kaihruai a ni.

Pu John Rotluangliana Hon’ble Minister FCS&CA, Transport and Tourism, Bialtu MLA ni bawk chuan Bial mipuite’n ropui taka chawimawiin pangpar thahnem tak nen an lo hmuah bakah khawlai dunga Mizo pipute in chawimawina anga ngaih a zawna an lo zawn hial chu phu lo a in tih thu leh lawmawm a tih thu a sawi a, hetiang dinhmun a dintirtu Chief Minister leh District chhung mipuite chungah lawmthu a sawi bawk.

Pu John Rotluangliana Bialtu MLA chuan thawhhona tha tak, khawtlang mipuite, party leh sawrkar hnathawk te’n kan neih kha chhunzawmin kan hmalam hun lo awm zel turah Bial tan, District tan leh ram tana thawk turin mipuite a sawm a, Inthlan hma a Party inepthinna te dah tha-in theihtawpa  ram  tana tan  lak a tul thu leh Congress MLA nilovin Bial mipuite MLA anih thu sawiin in thlahrung miah lova thurawn pe thin turin kalkhawmte a sawm bawk a ni.

Bialtu MLA chuan sawrkar hmachhawp hrang hrangte tarlangin Mamit to Bairabi inkar Tlawng Lei dawh chak taka hmalak a nih thu te, Mamit-a Petrol Pump pawh rei lote-ah hawn a nih tur thu te, Tuirial Hydel Project Megawat 60 pe chhuak thei tur kumin kum tawpah emaw, kum thar tirah hman theih tura hmalak a nih tur thu te, Rail kawng chak taka hmalak a nih tur thu te, PDS atanga Chini Supply tih tawp pawh tun thla chawhnu lamah chuan chhunzawm leh a nih tur thu te a sawi bawk a ni.

Bialtu MLA chuan mawhphurhna a neih te ram mipuite tana a tih hlawhtlin theih nana tawngtaipui turin mipuite a sawm a ni.

Pu John Rotluangliana Hon’ble Minister, FCS&CA etc hi a nupui Pi Vanlalhruaii, Pu Vabeiha Hlychho, Director Tourism;  Jonathan F. Zomawia,  P.A ten an tawiawm a ni.