Nimin ni 9 January, 2014 khan Minister of State Pu Lal Thanzara chuan National Highway No. 54, Buichali leh Kawnpui inkar kawng siamthat hna thawh mek chu a hmunah kalin, uluk takin a enfiah.

Minister hian National Highway No.54, Kawnpui leh Buichali inkar kawng, two-laning thawh lai mek chu enfiahin; a tira 35 km a thui chu, kawng kawi laiah diversion siamin, 30 km ah tihtawi a ni a. Kawnpui leh Buichali inkar kawng hi Package hnih-ah then niin, Package khatna hian Kawnpui leh New Khamrang inkar, 15km chhung a huam a; Package Hnihna hian New Khamrang leh Buichali inkar kawng, 15km chhung a huam bawk. Package Hnihna-New Khamrang leh Buichali inkar kawngah hian Land Acquisition-ah buaina awm lovin, sorkar laipui atangin Revised Estimate pawh January, 2013-khan hmuh a ni tawh a, kumin thal chhungin kawngsiam hna hi zawh hman a ni ang.

Package Khatna, Kawnpui leh New Khamrang inkar kawng erawh Land Acquisition-ah chinfel ngai a la awm avang leh, Revised Estimate Sanction hmuh tlai a nih avangin, kumin thal chhungin zawh vek hman a ni dawn lova. Minister chuan fur laia harsatna siam thei tur, diversion kawng siam lai leh fur laia kawng harsa lai bik, 10km chu kumin thal chhunga zo fel hman ngei turin contractor leh department hotute a hriattir a, anni pawhin zawh hman ngei an inbeisei thu an hrilh a ni.

Pu Lal Thanzara hi PWD Engineer-in-Chief, Er. Lianchungnunga; Chief Engineer (Highways) Er. John Rammawia; S.E. N.H, Circle-II, Er. Henry Lalmuankima leh department hotu dangte bakah Buichali leh Kawnpui inkar kawng siamthat hna thawktu ABCI-a Project Manager, Premlal Dhiman leh a hoten an tawiawm a ni.