2838/2023-2024

2023 Sahmulphah thla ni 23: Vawiin khan School of Nursing Thingdawl (SONT), Kolasib chuan an School Auditorium-ah General Nursing & Midwifery (GNM) 7th batch zirlaite lukhum khumtirna leh khawnvar chhi-a thu tiam lakna hun (Capping and Lamp Lighting Ceremony) leh 4th batch SONT aṭanga zir chhuakte certificate hlanna hun (Graduation Ceremony) an buatsaih.

He hun hi Mizoram Sawrkara Health & Family Welfare Department Principal Director, Directorate of Nursing Director ni bawk Dr Vanlalsawma chuan hmanpuiin, zirlaite leh zir chhuak tate fuihna thu a sawi a. Damlo enkawltute'n damlote tana kan tih theih sang ber chu ṭawngka leh chetziaa hmangaihna lantir a ni tiin, damlote rilru taka hmangaih leh duhsak a pawimawh, a ti a. Nurse-te chu damlote nena inngheng hnai ber an nih angin damlote enkawlna chu an kutah a innghat thuk hle tih a sawi a. SONT Kolasib-a zirlaite chu ram tan leh mi dangte tana rawngbawl thei turin ṭha taka an zirlai zir chhuah tum tur te, zir chhuak tate pawh nurse hna zahawmna chawi nung zel tur leh mi dang tana malsawmna nih tum zel tur tea chahin, duhsakna a hlan a ni.

He hunah hian Joint Director (Nursing) Pi Lalchhanhimi chuan 7th batch zirlai tharte chu lukhum khumtirin, khawnvar a chhittir a; zirlai tharte chuan thu tiam an sawi rual nghal bawk. Pi Lalchhanhimi chuan lukhum chu nurse hna zahawmna kengtu pakhat a nih thu sawiin, lukhum var chuan thianghlimna leh damlo, mi harsa leh mangangte tana inhlanna leh inpekna a entir tih a sawi a. Khawnvar chhit chu Florence Nightingale-i hniakhnung zuia mi dang tana beiseina mei eng chhi zel tura intiamna a nih thu a sawi.

He hunah hian Tutor Pi Lalthlamuani'n inlawmna thu sawiin, SONT Choir te'n hawnna hla an rem a. District Hospital Kolasib-a Staff Nurse Pi Vanlalhnaii chuan hunserh hmangin, School Principal Pi Lalṭanpuii'n school report tlangpui a sawi a. Kum 2023 Mizoram Nursing Council examination-a 1st year topper Lalremruati hnenah Pu Lalchhunga (L) Memorial Award chu donor, School Principal Pi Lalṭanpuii'n hlanin, SONT Kolasib aṭanga top 10-a lang 2nd year zirlai pahnih leh final year zir chhuak pahnih hnenah District Hospital Kolasib-a District Medical Superintendent Dr Samuel Lalfakawma Fanai chuan chawimawina (merit prize) a hlan bawk a. Zirlai nu leh pate, zir chhuakte leh sawm bikte hnen aṭangin thu sawi ngaihthlak niin, graduate tharte leh zirlai tharte hnen aṭangin zai leh lam ngaihthlak leh thlir ho a ni a. Tutor Pi KC Kimlianmawii'n lawm thu sawiin, Presbyterian Church of India (PCI), Thingdawl bialtu pastor Rev. Zairemkima chuan zirlai tharte leh zir chhuakte ṭawngṭaisakna hun a hman bakah, malsawm ṭawngṭaiin hun a khar a ni.

He hunah hian health department-a thawkte, sawrkar official-te, SONT Kolasib-a thawkte, zirlaite leh zirlai nu leh pate leh sawm bik mi eng emaw zat an tel a ni.

School of Nursing Thingdawl, Kolasib hi December 2017 khan zirlai 20 awma bul ṭan niin, batch 4-in an zir chhuak tawh a. GNM hi pawl 12 pass hnua zir theih niin, kum 3 zir (course) a ni a. Tunah hian SONT Kolasib-ah hian Principal 1, tutor 6, non-teaching staff 9 leh zirlai 60 an awm mek a. Tun ṭumah hian 4th batch aṭangin zir chhuak (graduate) mi 20 (mipa 1 leh hmeichhia 19) awmin, 7th batch 1st year zirlai 20 (hmeichhia vek)-in thu tiam an la thar ve thung a ni.