Vawiin nileng khan I&PR Auditorium-ah Mizoram chhunga sorkar College hrang hranga zirtur subject semzai leh kalpui dan tur chungchanga inrawnkhawmna hun chu Directorate of Higher and Technical Education huaihawtin College Principal leh zirtirtu thahnem takin an hmanga, H &TE Minister Pu Lalsawta’n hmanpuiin thuchah a sawi a ni.

Minister chuan Mizoram sorkarin khawvel huap zirna tha leh changkang neih a tum mekah hian thlirlawk leh tinzawn (vision) fel tak neia kal a nih thu leh chu vision-ah chuan sorkar a chiang tawka, duhthusam leh tawngvaih thil mai mai a ti kan ni lo, a ti. Zirna tih hian hriatthiamna tak tak a pawchhuak ngei ngei tur a ni tiin Pu Lalsawta chuan Mizoram chhunga zirna peng zawng zawngah tanlak mek anih dan a tarlang a. Rampum leh khawvel thangchak tak mila zirna kalpui thiam a tul a, tun dinhmuna Mizoram College hrang hranga subject zirlai semzai leh ruahman tharte pawh a tul tak avangin he inrawnkhawmna hi buatsaih a ni, a ti a. Mizoram College pawhin National Assessment and Accreditation Council leh University Grants Commission duhdan zuia kal a tul avangin insawi danglam (change) a ngai dawn a ni, a ti. H &TE Minister chuan Hrangbana College ten tunhnaia NAAC atanga A Grade dinhmun an thleng chu Mizoram zirna pumpui a thil chhinchhiahtlak leh lawmawm a nih thu a tarlang bawk.

Vawiina inrawnkhawmna hun buatsaih hi H &TE Director Dr. H.L. Malsawma’n a kaihruai a. Hun hmanpui tu H &TE Secretary Pi Esther Lalruatkimi pawhin he inrawnkhawmna atanga an thutlukna siam chu sorkar-in enzuiin a tul anga bawhzui tur anih thu leh kalphung pangngai thlakthleng tum ngawr ngawrna satliah ni lovin zirna in hmasawnna leh thil tha a thlenchhuah theih zawk beisei a buatsaih a nih dan kalkhawm te a hrilhfiah a ni.

Vawiinah hian Jt. Director H &TE Pu Zochungnunga thuziak chhiarchhuaha sawihona hi tan a ni a, College hrang hrang atanga Principal 18 leh zirtirtu thahnem tak kalkhawm ten sawihona hun leh inhrilhfiah ngaite inhrilhfiahin ngaihdan hrang hrang lakkhawm a ni.